संसद्को दुवै सदनको बैठक आज, यस्ता छन् कार्यसूची
मकालु खबर
काठमाडौँ । सङ्घीय संसद्को दुवै सदन प्रतिनिधिसभा र राष्ट्रियसभाको बैठक आज बस्ने तय भएको छ । प्रतिनिधिसभाको बैठक बिहान ११ बजे सुरु हुनेछ भने राष्ट्रियसभा बैठक दिउँसो १:१५ मा बस्नेछ ।
प्रतिनिधिसभाको बैठकमा ‘बैंकिङ्ग कसुर तथा सजाय (दोस्रो संशोधन) विधेयक, २०८०’ सम्बन्धी राष्ट्रिय सभाबाट प्राप्त सन्देश सहितको विधेयक टेबुल गरिनेछ । साथै, कानुन, न्याय तथा संसदीय मामिला मन्त्री अजय कुमार चौरसियाले राष्ट्रिय सभामा उत्पत्ति भएको ‘नेपाल कानुन व्यवसायी परिषद् (दोस्रो संशोधन) विधेयक, २०८१’ माथि छलफलका लागि प्रस्ताव पेश गर्ने कार्यक्रम रहेको छ ।
प्रधानमन्त्री केपी शर्मा ओलीले ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०७९’ माथि छलफल गर्न प्रस्ताव प्रस्तुत गर्नेछन् । साथै, सोही विधेयकको संशोधित संस्करण ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०८१’लाई पारित गर्न प्रस्ताव अघि सार्ने संसद् सचिवालयले जनाएको छ ।
राष्ट्रियसभा बैठकमा विभिन्न मन्त्रालयहरूसँग सम्बन्धित मौखिक प्रश्नहरूको उत्तर सम्बन्धित मन्त्रीहरूले दिनेछन् । भौतिक पूर्वाधार तथा यातायात, संस्कृति, पर्यटन तथा नागरिक उड्डयन, सङ्घीय मामिला तथा सामान्य प्रशासन, र कृषि तथा पशुपन्छी विकास मन्त्रालयका विषयमा सांसदहरूले प्रश्न उठाउन सक्नेछन् ।
यसैगरी, प्रधानमन्त्री ओलीले ‘मुस्लिम आयोगको आर्थिक वर्ष २०८०-८१ को वार्षिक प्रतिवेदन’ संसद्मा पेश गर्नेछन् । साथै, विकास, आर्थिक मामिला तथा सुशासन समितिका सभापति कमला पन्तले ‘दलित समुदायको अधिकार तथा विकास सम्बन्धमा कानुनी व्यवस्थाको आवश्यकता सम्बन्धी प्रतिवेदन, २०८१’ माथि छलफल गर्न प्रस्ताव पेश गर्ने कार्यक्रम छ ।
मकालु खबर
