करिब ६ घण्टा पछि इटहरीमा भएको आगलागी नियन्त्रणमा
मकालु खबर
काठमाडौँ । सुनसरीको इटहरी चोकमा भएको आगलागी पूर्णरुपमा नियन्त्रणमा आएको छ ।
करिब ६ घण्टापछि इटहरी चोकस्थित सेन्ट्रल प्लाजामा भएको आगलागी पूर्णरुपमा नियन्त्रणमा आएको हो ।
सुनसरी जिल्लाका प्रमुख जिल्ला अधिकारी धर्मेन्द्र कुमार मिश्रले उक्त आगलागीमा कुनै पनि मानवीय क्षति नभएको मकालुखबरलाई जानकारी दिए ।
उनले आगलागीबाट ‘के कति क्षति भयो ?’ भन्नेबारे विवरण नआइसकेको बताए ।
उक्त आगलागीबाट ११ जनाको उद्धार गरिएको छ । उद्धार गरिएकाहरू मध्ये ८ पुरुष र ३ महिला रहेका छन् ।
बुधवार बिहान साढे ९ बजेदेखि सेन्ट्रल प्लाजाको चौथो तलामा आगलागी भएको थियो ।
आगोलागी नियन्त्रणका लागि १२ वटा दमकलसहित नेपाली सेना, नेपाल प्रहरी र सशस्त्र प्रहरीको टोली खटिएको थियो ।
सेन्ट्रल प्लाजाबाट उद्धार गरिएकामध्ये एक महिला सामान्य घाइते भएकी थिइन् ।
उनी सामान्य उपचारपछि अस्पतालबाट घर फर्किसकिन् । उद्धारमा खटिएका ७ जना सुरक्षाकर्मी पनि सामान्य घाइते भएको प्रमुख जिल्ला अधिकारी मिश्रले बताए । उनले नेपाल प्रहरीका ५, सशस्त्र प्रहरीका १ र नेपाली सेनाका एक जना सामान्य घाइते भएको जानकारी दिए ।
यि हुन् उद्धार गरिएका व्यक्तिहरूको नामावली :
- भोजपुर आमचोक बस्ने वर्ष २३ कि मेरिका राई ।
- कैलाली बस्ने वर्ष २६ कि लक्ष्मी श्रेष्ठ ।
- सुनसरी बराहक्षेत्र ५ बस्ने वर्ष २६ को विजय धामी ।
- काभ्रेका विष्णु तामाङ (उमेर खुल्न बाँकी)
- बंगलादेशका नागरिकD JAY (उमेर खुल्न बाँकी)
- धनुषा कमला ९ बस्ने वर्ष ४४ को संजय जैसवाल ।
- मोरङ विराटनगर १५ बस्ने वर्ष २४ कि दिया राय ।
- मोरङ विराटनगर १५ बस्ने वर्ष २८ को विशाल सिंह ।
- सुनसरी रामधुनि ७ बस्ने वर्ष २४ को आशिष चौधरी ।
अन्य २ जनाको खुल्न पहिचान खुल्न बाँकी छ ।
मकालु खबर
