प्रतिपक्षी दलको निरन्तरको अवरोधपछि प्रतिनिधि सभा बैठक स्थगित, बिहीबार बस्ने

काठमाडौं । प्रमुख प्रतिपक्षी दल नेकपा माओवादी केन्द्र सहितका प्रतिपक्षी दलहरुको निरन्तरको अवरोधपछि प्रतिनिधिसभा बैठक स्थगित भएको छ ।

बिहान ११ बजे बोलाइएको प्रतिनिधिसभाको बैठक विपक्षीको अवरोधका कारण चल्न नसकेपछि भोलि(बिहीबार) सम्मका लागि स्थगित गरिएको हो ।

यसअघि सभामुख देवराज घिमिरेले पटक-पटक सदन सञ्चालनको वातावरण बनाउन प्रतिपक्षी दलका सांसदहरुलाई अनुरोधसहितको रुलिङ गरेका थिए ।

बुधबारको बैठकको प्रारम्भमै प्रतिपक्षी दलका सांसदहरुले कुलमान घिसिङलाई नेपाल विद्युत् प्राधिकरणको कार्यकारी निर्देशकबाट सरकारले बर्खास्त गरेको विषयप्रति विरोध जनाउँदै बैठक अवरोध गरेका थिए ।

उनीहरुले यसबारे प्रधानमन्त्री केपी शर्मा ओलीले सदनमा जवाफ दिनुपर्ने माग गर्दै संसद अवरुद्ध गरेका थिए ।

सभामुख घिमिरेका अनुसार अर्को बैठक बिहीबार बिहान ११ बजे बस्नेछ ।