काठमाडौंमा कर्फ्यूको समय थप, सुरक्षा सतर्कता उच्च

काठमाडौं । काठमाडौंका तीनकुने, कोटेश्वर र सिनामंगल क्षेत्रका बासिन्दाले शनिबार बिहान ७ बजेसम्म कर्फ्यूको सामना गर्नुपर्ने भएको छ। जिल्ला प्रशासन कार्यालय काठमाडौंले शुक्रबार राति कर्फ्यूको समय थप गर्दै यसबारे जानकारी गराएको हो। प्रारम्भिक निर्णयअनुसार दिउँसो ४:२५ देखि राति १० बजेसम्म मात्र कर्फ्यू लगाउने भनिए पनि परिस्थितिको गम्भीरता बुझ्दै प्रशासनले थप समय लम्ब्याउने निर्णय गरेको थियो।

प्रशासनका अनुसार कर्फ्यूपछि अवस्था केही हदसम्म सामान्य बन्दै गएको छ। सुरक्षा व्यवस्था कडा बनाइएपछि नेपाली सेनाका बख्तरबन्द गाडीसमेत सडकमा देखिन थालेका छन्, जसका कारण स्थिति नियन्त्रणमा आएको प्रशासनले जनाएको छ।

काठमाडौंका प्रमुख जिल्ला अधिकारी ऋषिराम तिवारीले कर्फ्यू क्षेत्रभित्र कुनै पनि प्रकारका भेला, जुलुस, प्रदर्शन वा घेराउजस्ता गतिविधिहरू निषेध गरिएको स्पष्ट पारेका छन्। यसअघि पूर्वराजाका समर्थकहरूले शान्तिपूर्ण प्रदर्शनका लागि अनुमति लिएर विरोध प्रदर्शन गरेका थिए, तर निषेधित क्षेत्र उल्लंघन भएपछि स्थिति बिग्रिएको थियो। प्रहरीका अनुसार प्रदर्शनका क्रममा निजी सम्पत्ति, अस्पताल, सञ्चारगृह, राजनीतिक दलका कार्यालय, व्यापारिक क्षेत्र तथा सार्वजनिक यातायातका सवारी साधनमा तोडफोड गरिएको थियो।

झडपका कारण मानविय र भौतिक क्षति भएको प्रहरीले पुष्टि गरेको छ। प्राप्त विवरणअनुसार तीनकुने घटनामा परी कीर्तिपुर–४ का सविन महर्जनको उपचारका क्रममा त्रिभुवन विश्वविद्यालय शिक्षण अस्पतालमा निधन भएको छ। त्यस्तै, तीनकुनेस्थित मार्बल हाउसमा सुरेश रजक मृत अवस्थामा फेला परेको छ।

यस घटनामा नेपाल प्रहरीका ५३ जना, सशस्त्र प्रहरी बलका २२ जना तथा प्रदर्शनकारी पक्षका ३५ जना घाइते भएका छन्। भौतिक क्षतिको विवरण अनुसार नौ वटा सरकारी सवारी साधन र छ वटा अन्य सार्वजनिक तथा निजी सवारी साधनमा आगजनी भएको छ। यसैगरी, विभिन्न १४ स्थानमा आगजनी, नौ वटा संस्थामा तोडफोड र एक स्थानमा लुटपाट भएको छ।

काठमाडौं प्रहरी परिसरका प्रहरी उपरीक्षक अपीलराज बोहराका अनुसार अवस्थालाई नियन्त्रणमा लिन सुरक्षाकर्मीहरू उच्च सतर्कतामा छन्। प्रशासनले नागरिकहरूलाई अनावश्यक रूपमा कर्फ्यू क्षेत्रमा नजान आग्रह गरेको छ।