म्यानमार शक्तिशाली भूकम्पमा परी १४४ जनाको मृत्यु, सयौँ घाइते

काठमाडौं । म्यानमारमा गएको शक्तिशाली ७.७ म्याग्निच्युडको भूकम्पका कारण कम्तीमा १४४ जनाले ज्यान गुमाएका छन् भने ७३२ जना घाइते भएका छन् । मृतक र घाइतेको संख्या अझै बढ्न सक्ने अनुमान गरिएको छ ।

म्यानमारको सैन्य शासन प्रमुख मिन आङ ह्लिङलाई उद्धृत गर्दै बीबीसीले यो जानकारी दिएको छ । भूकम्पका कारण म्यानमारमा विद्युत, टेलिफोन र इन्टरनेट सेवा अवरुद्ध भएको छ । सन् २०२१ देखि सैन्य शासनमा रहेको म्यानमारमा यो विपत्तिले थप संकट निम्त्याएको छ । यस भूकम्पको धक्का छिमेकी देशहरू थाइल्याण्ड र चीनमा पनि महसुस गरिएको थियो । थाइल्याण्डमा एउटा भवन भत्कँदा तीन जनाको मृत्यु भएको छ ।

यद्यपि, थाई प्रशासनले थप जानकारी सार्वजनिक गरेको छैन । भूकम्प प्रभावित म्यानमारमा उद्धार र राहतका लागि चिनियाँ विपद् प्रतिक्रिया टोली पुगेको छ ।