तीनकुने घटनाको सम्पुर्ण जिम्मेवार सरकार हो : राजेन्द्र लिङ्देन

काठमाडौँ । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले तीनकुने घटनाको जिम्मेवार सरकारको भएको बताएका छन् ।

आज पार्टीको केन्द्रीय कार्य सम्पादन समितिको बैठकपछि पत्रकारहरूसँग कुराकानी गर्दै उनले यस्तो बताएका हुन् ।

उनले हिजो काठमाडौँको तीनकुने क्षेत्रमा राजावादीले आन्दोलन गर्ने क्रममा विभिन्न ठाउँमा भएको क्षतिको जिम्मेवार सरकार भएको पार्टीको निष्कर्ष रहेको बताए ।

उनले भने ‘हिजो सरकार आफै हिंसा भड्काउन र दमन गर्ने योजनाका साथ परिचालित भएको थियो । हिजोको सम्पूर्ण घटनाको जिम्मेवार सरकार हो भन्ने हाम्रो निष्कर्ष छ ।’

उनले पत्रकार सुरेश रजकलाई बचाउन सक्ने प्रशस्त सम्भावना हुँदाहुँदै पनि उनलाई बचाउनमा सरकारी संयन्त्र उदासीन देखिएको आरोप लगाए ।

भने ‘शान्तिपूर्ण ढंगले सभा चली रहेको मञ्चमा सुनियोजित रुपमा घरबाट टियोर ग्यास फ्याँकियो । पहिल्यै नै सुरक्षाकर्मी त्यहाँ बसेर त्यसबाट पनि सरकार बिथोल्न चाहन्थ्यो । प्रदर्शनलाई भड्काउन चाहन्थ्यो भन्ने देखिन्छ । पत्रकार सुरेश रजकलाई बचाउन सक्ने प्रशस्त सम्भावना हुँदाहुँदै पनि उनलाई बचाउनमा सरकारी संयन्त्र उदासीन रहेको देखियो ।’

उनले कतिपय व्यावसायिक भवनहरूमा सरकारले सुरक्षा दिन सक्ने देखिदा देखिँदै पनि लुटपाट गर्दाखेरि सुरक्षा उपलब्ध गराएको गुनासो गरे ।

उनले प्रस्ट रुपमा भिडिओहरू प्राप्त भएका भन्दै सरकारी मानिसहरू साधा पोसाकमा पेस्तोल लिएर मान्छेलाई ताक्दै ताक्दै हिँडेको बताए । उनले प्रहरीले गोली चलाउनै नपर्ने ठाउँमा ताकि ताकि गोली हानेको बताए । उनले नियमभन्दा बाहिर गएर मानिसलाई गोली हानिएको बताए ।