गुजरातको पहिलो जित, मुम्बई लगातार दोस्रो खेलमा पराजित

काठमाडौं । इन्डियन प्रिमियर लिग (आईपीएल) अन्तर्गत शनिबार राति सम्पन्न खेलमा गुजरात टाइटन्सले मुम्बई इन्डियन्सलाई ३६ रनले पराजित गर्दै सिजनको पहिलो जित दर्ता गरेको छ। मुम्बईका लागि यो लगातार दोस्रो हार हो।

मुम्बईले टस जितेर फिल्डिङ रोजेपछि पहिले ब्याटिङ गरेको गुजरातले २० ओभरमा ८ विकेट गुमाउँदै १९६ रनको प्रतिस्पर्धात्मक योगफल खडा गर्यो। गुजरातका लागि शाही सुदर्शनले सर्वाधिक ६३ रन बनाए, जसमा उनले ४१ बलमा चार चौका र दुई छक्का प्रहार गरे। जोश बटलरले २४ बलमा ३९ रनको योगदान दिए भने कप्तान शुभमन गिल ३८ रनमा सीमित भए। शेर्फेन रदरफोर्डले थप १८ रन जोडे।

मुम्बईका बलरमध्ये हार्दिक पाण्ड्याले सबैभन्दा प्रभावशाली प्रदर्शन गरे। उनले ४ ओभरमा २५ रन खर्चेर २ विकेट लिए भने ट्रेन्ट बोल्ड, दीपक चाहर, सत्यनारायण राजु र मुजिब उर रहमानले समान १–१ विकेट लिए।

१९७ रनको लक्ष्य पछ्याएको मुम्बई २० ओभरमा ६ विकेट गुमाएर १६० रनमा सीमित भयो। सूर्यकुमार यादवले सर्वाधिक ४८ रन बनाए भने तिलक वर्माले ३९ रनको योगदान दिए। नमन धीर र मिचेल सान्टनेरले समान १८ रन जोडे। कप्तान हार्दिक पाण्ड्याले १७ बलमा मात्र ११ रन बनाउन सके। रोहित शर्मा र रायन रिकेल्टन क्रमशः ८ र ६ रनमै आउट भए।

गुजरातका लागि मोहम्मद सिराज र प्रशिद्ध कृष्णले समान २–२ विकेट लिए। कागिसो रबाडा र शाई किशोरले १–१ विकेट झारे।

आईपीएल अन्तर्गत आइतबार दुई खेल हुँदैछन्। पहिलो खेलमा दिल्ली क्यापिटल्सले सनराइजर्स हैदरावादसँग प्रतिस्पर्धा गर्नेछ भने दोस्रो खेलमा राजस्थान रोयल्स र चेन्नई सुपर किंग्स आमनेसामने हुनेछन् ।