कोलकातालाई हराउँदै मुम्बईले निकाल्यो पहिलो जित

काठमाडौं । इन्डियन प्रिमियर लिग (आईपीएल) २०२५ मा मुम्बई इन्डियन्सले आफ्नो पहिलो जित हासिल गरेको छ । सोमबार सम्पन्न खेलमा मुम्बईले कोलकाता नाइट राइडर्सलाई ८ विकेटको फराकिलो अन्तरले पराजित गर्दै प्रतियोगितामा पहिलो जितको स्वाद चाख्यो ।

वानखेडे रंगशालामा भएको खेलमा टस हारेर पहिला ब्याटिङ गरेको कोलकाताले १६.२ ओभरमै अलआउट हुँदै ११६ रनको मध्यम लक्ष्य प्रस्तुत गर्यो । टोलीका लागि अंकृश रघुवंशीले सर्वाधिक २६ रन योगदान दिए भने मनदीप सिंहले २२, मनिष पाण्डेले १९ र रिंकु सिंहले १७ रन जोडे ।

बलिङतर्फ मुम्बईका अश्वनी कुमार चम्किए । डेब्यू खेलमै उनले शानदार प्रदर्शन गर्दै तीन ओभरमा मात्र ८ रन खर्चेर चार विकेट लिए । यस्तै, दीपक चहरले दुई विकेट हात पारे भने ट्रेन्ट बोल्ट र कप्तान हार्दिक पाण्ड्याले एकएक विकेट लिए ।

११७ रनको लक्ष्य पछ्याउने क्रममा मुम्बईका ब्याट्सम्यानहरू सहज प्रदर्शन गर्दै अघि बढे । ओपनर रायन रिकेल्टनले उत्कृष्ट खेल प्रदर्शन गर्दै अविजित ६२ रन बनाए, जसमा चार चौका र पाँच छक्का समावेश थिए। सुर्यकुमार यादवले केवल ९ बलमा २७ रनको तूफानी पारी खेले, जसमा तीन चौका र दुई छक्का सामेल थिए । यस्तै, विल ज्याक्सले १६ रन बनाए भने रोहित शर्मा १३ रनमा आउट भए ।

कोलकाताका बलरमध्ये आन्द्रे रसेलले मात्र प्रभाव पार्न सके, जसले २.५ ओभरमा ३५ रन खर्चेर दुई विकेट लिए ।