सडक बालबालिकाले बालिग भइसक्दा समेत जन्मदर्ता पाउन सकेनन् : सांसद राना

काठमाडौँ । नेपाली काँग्रेसकी सांसद सीताकुमारी रानाले कानुनको सफल कार्यान्वयन गर्न नसक्दा सडक बालबालिकाहरू बालिग भइसक्दा समेत जन्मदर्ता पाउन नसकेको बताएकी छन् ।

मंगलवार काठमाडौँमा आयोजित एक कार्यक्रममा बोल्दै उनले यस्तो बताएकी हुन् ।

उनले कानुन कार्यान्वयनको अभावका कारण सडक बालबालिकाहरू अनागरिक भएर बस्नुपरेको बताइन् । उनले राजनीतिक दल र कर्मचारीहरूले समेत दलगत रूपमा हेर्दा नागरिकले दुःख पाउनुपरेको उनको भनाइ छ । उनले पञ्जीकरण शाखाहरूले दिने सेवा सुविधामा समेत राजनीति प्रवेश गरेर अल्झाइरहेको बताइन् ।

उनले जन्मदर्तासम्बन्धी स्पष्ट कानुन हुँदाहुँदै पनि स्थानीय तहका जनप्रतिनिधिहरूमा कानुनी अज्ञानताको कारणले समस्या पाएको बताए । सडक बालबालिकालाई समयमै जन्मदर्ता प्रदान गरी उनीहरूको अधिकार र हक सुनिश्चित गर्नुपर्नेमा उनको जोड छ ।

उनले भने ‘सरकारले कानुन कार्यान्वयन गर्न नसक्दा सडक बालबालिकाहरूले दुःख पाइरहेको अवस्था छ । हाम्रा नीतिहरू प्रस्ट छन् । ती प्रस्ट नीतिहरूलाई हामीले तल्लो लेभलसम्म कार्यान्वयन गर्न सकेका छैनौँ । हामी कानुन र नीतिहरूको कार्यान्वयनको क्रममा आम नागरिकका लागि जनचेतनाका कार्यक्रमहरू चलाएका छौँ कि छैनौँ रु राजनीतिक पार्टीका प्रतिनिधिहरूले समेत सेवाग्राहीहरूलाई पार्टीगत हिसाबले हेर्ने कारणले गर्दा सडक बालबालिकाकाहरुले दुःख पाइरहेको मैले महसुस गरेको छु । नेपाल सरकारले दिने थप्रै सेवा सुविधाहरू पञ्जीकरण शाखाबाट दिनुपर्ने कुराहरू छन् । ती सेवाहरूमा राजनीति प्रवेश गरेर अल्झाइरहेको अवस्था छ । हाम्रा वडा अध्यक्ष र पालिका प्रमुखहरूको अज्ञानताका कारणले पनि थुप्रै कानुनहरू कार्यान्वयन भइरहेको छैन ।’

संविधानमा ‘नेपालभित्र फेला परेको र पितृत्व र मातृत्व ठेगान नभएको प्रत्येक नाबालक निजको बाबु र आमा फेला नपरेसम्म वंशजको आधारमा नेपालको नागरिक ठहर्ने’ व्यवस्था छ ।