आवासीय चिकत्सकको २४ घण्टे ‘अल्टिमेटम’, माग सम्बोधन नभए आन्दोलनमा जाने

काठमाडौं । आवासीय चिकित्सकहरुले पुन: आन्दोलन गर्ने भएका छन् । मंगलबार स्वास्थ्यकर्मीका लागि सुरक्षित कार्यस्थल संघर्ष समितिले एक प्रेस विज्ञप्ति जारी गर्दै २४ घण्टे अल्टिमेटम दिएर पुनः आन्दोलनको चेतावनी दिएको हो ।

डा.सञ्जष्य बरालका अनुसार सम्पूर्ण निजी मेडिकल कलेजका एमडी, एमएस, एमडीएस आवासीय चिकित्सकहरूको मासिक पारिश्रमिक (सरकारी आठौं तह सरह) २४ घण्टाभित्र भुक्तानी नगरिए आन्दोलन गर्ने चेतावनी दिएका हुन् ।

त्यस्तै चिकित्सा शिक्षा आयोगले पीजीको म्याचिङ प्रक्रिया सच्याउनुपर्ने माग गरेका छन् । सम्पुर्ण आवासीय चिकित्सकहरुले आठौं तह सरकारी सरह पारिश्रमिक पाउने सुनिश्चित गरी आयोगले प्रवेश परीक्षा अगाडि प्रकाशित नीजि मेडिकल कलेजका सिटसमेत समावेश गर्नुपर्ने उनीहरूको माग छ ।

मागहरू २४ घण्टा भित्र पूरा नगरे थप मागहरुसहित नीजि मेडिकल कलेजमा अनिश्चितकालिन रूपमा सेवा बहिष्कार लगायत थप विरोधका कार्यक्रमहरु गर्न बाध्य हुने समेत चेतावनी दिइएको छ ।