हिरासतमा कस्तो छ रवीन्द्र र धवलको दिनचर्या ?

काठमाडौं । राष्ट्रिय प्रजातन्त्र पार्टीका उपाध्यक्ष रवीन्द्र मिश्र र महामन्त्री धवलशमशेर जबरा भद्रकालीस्थित जिल्ला प्रहरी परिसर काठमाडौंको हिरासतमा रहेका छन् । उनीहरूलाई चैत १५ गते राति प्रहरीले पक्राउ गरेको हो ।

तीनकुनेमा भएको प्रदर्शनका क्रममा प्रदर्शनकारीलाई उत्तेजित बनाएर निजी तथा सार्वजनिक सम्पत्तिमा तोडफोड गर्ने तथा हिंसात्मक वातावरण सिर्जना गर्ने आरोपमा नियन्त्रणमा लिइएको हो । प्रहरीका अनुसार उनीहरूमाथि राज्यविरुद्धको कसुरमा अनुसन्धान भइरहेको छ ।

मिश्र र जवरालाई प्रहरीले एउटै कोठामा राखेको छ । उनीहरू हिरासतमा पार्टीका नेता तथा कार्यकर्तासँग भेटघाट गर्ने र आपसी संवाद गर्दै समय बिताउने गरेका छन् । महामन्त्री जबरा क्यान्सरका बिरामी भएकाले उनको स्वास्थ्य अवस्थालाई ध्यानमा राख्दै प्रहरीले आवश्यक व्यवस्था गरेको बताइएको छ ।

खानपानका विषयमा दुवैजना प्रहरीको सामान्य भोजन नखाई आफ्नै इच्छाअनुसार प्रहरी क्यान्टिनबाट खाना अर्डर गर्छन् । प्रहरीका अनुसार मिश्र र जबराले मासु र रोटी रुचाउँछन् भने जबराले बेलाबेला स्याउ र काजु पनि सेवन गर्ने गरेका छन् । उनीहरूले नियमित रूपमा ‘मिनरल वाटर’ मात्र पिउँछन् ।

उनीहरूलाई भेट्न राप्रपा नेपालका अध्यक्ष कमल थापा, राष्ट्रिय प्रजातन्त्र पार्टीका अध्यक्ष राजेन्द्र लिङ्देन, डा. प्रकाशचन्द्र लोहनी, पशुपति शमशेर जबरा, ज्ञानेन्द्र शाही र जयन्द्र चन्द लगायतका नेताहरू पुगेका छन् । प्रारम्भमा प्रहरी प्रशासनले मिश्रलाई अन्य थुनुवासँगै राखेको थियो । तर, मिश्रले असुविधाको गुनासो गर्दै सामान्य थुनुवासँग सुत्न कठिन भएको बताएका थि ए। गुनासोपछि प्रहरीले उनलाई जबरासँगै एउटै कोठामा राखेको हो ।

काठमाडौं जिल्ला अदालतले मिश्र र जबरालाई ५ दिनसम्म हिरासतमा राखी अनुसन्धान गर्न अनुमति दिएको छ । उनीहरूसँगै ११ जनालाई राज्यविरुद्धको कसुर र ३० जनालाई आपराधिक उपद्रवमा संलग्न रहेको आरोपमा प्रहरीले अनुसन्धान गरिरहेको छ ।