खबर दिनभर : बालेनको असहमतिकाबीच ‘हाकिम’ ले गरे हाजिर, अफगानिस्तानसंग हार्यो नेपाल
मकालु खबर
जनतासँग सम्बन्ध सुदृढ गर्न जागरण अभियान : प्रचण्ड
नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले जनताका कुरा सुन्न र सम्बन्ध सुदृढ गर्न हुलाकी राजमार्ग केन्द्रित तराई मधेस जागरण अभियान पुनः थालिएको बताएका छन् ।
अभियानअन्तर्गत माओवादी केन्द्र बाँकेले आज नेपालगञ्जमा आयोजना गरेको नागरिक अन्तरसंवाद कार्यक्रममा पूर्वप्रधानमन्त्री दाहालले विगतमा जनताको भावना बुझ्न नसकेकाले अहिले भूगोलमै पार्टी नेतृत्व खटिएको उल्लेख गरे ।
“विगतमा नेता कार्यकर्ताको घेराबन्दीमा परेर गल्ती गरियो, अब हामी नेता कार्यकर्ताको रिपोर्टमा भर पर्दैनौँ, सिधै जनताका कुरा सुन्न आएका छौँ”, उनले भने, “हामी सच्चिन तयार छौँ, सच्चिन्छौँ र जनतासँगको सम्बन्ध सुदृढ बनाउँछौँ ।”
हुलाकी राजमार्ग छेउछाउ सिमाना नजिक बस्ने नागरिकको अवस्था र भावना बुझ्न जनताको घरघरमा आफूहरु पुग्ने गरेको अध्यक्ष दाहालको भनाइ थियो । उहाँले भन्नुभयो, “जनताकै घरमा बसेर जनताका कुरा सुन्न चाहेका छौँ ।”
राजनीतिक दल र नेताको आचरणले गर्दा जनतामा असन्तुष्टि बढ्दै गएका कारण प्रतिगमनले टाउको उठाएको उल्लेख गर्दै अध्यक्ष दाहालले योभन्दा परिस्थिति बिग्रिए मुलुकमा ठूलो दुर्घटना हुने भएकाले सबै गणतन्त्रवादी जिम्मेवार भएर लाग्न जरुरी भएको बताए ।
“राजावादीको चरित्र जे थियो त्यो चैत १५ गते देखियो । हामीले शालिन तरिकाले जवाफ दियौँ”, उहाँले भन्नुभयो, “प्रतिगमनविरुद्ध अभियान छेडेर प्रतीकार ग गर्यौँ ।”
माओवादी केन्द्र बाँकेका संयोजक नरेन्द्र पाण्डेको अध्यक्षतामा भएको नागरिक अन्तरसंवाद कार्यक्रममा नेपालगञ्ज उद्योग वाणिज्य सङ्घका अध्यक्ष टङ्क धामी, पूर्वअध्यक्ष कृष्णप्रसाद श्रेष्ठ र अब्दुल वाहिद मन्सुरी, महेन्द्र बहुमुखी क्याम्पसका प्रमुख लालमणी आचार्य, अधिकारकर्मी भोला महत, जडीबुटी व्यवसायी सङ्घका अध्यक्ष टङ्क शर्मा, पत्रकारहरु जे पाण्डे, झलक गैरे, शरण कर्माचार्य लगायतले लोकतन्त्रको विकल्प लोकतन्त्र नै भएकाले राजनीतिक दल र नेता सच्चिनुपर्ने सुझाव दिएका थिए ।
कार्यक्रममा माओवादी केन्द्रका उपाध्यक्षत्रय नारायणकाजी श्रेष्ठ, अग्नीप्रसाद सापकोटा र कृष्णबहादुर महरा, महासचिव देव गुरुङलगायत केन्द्रीय नेताहरुको सहभागिता रहेको थियो ।
मधेशकेन्द्रित ७ दलको ‘संघीय लोकतान्त्रिक मोर्चा’ घोषणा
तराई–मधेस केन्द्रित सात राजनीतिक दलले ‘सङ्घीय लोकतान्त्रिक मोर्चा’ घोषणा गरेका छन् । संविधान संशोधन, सङ्घीय लोकतान्त्रिक गणतन्त्रको रक्षा, सुशासन प्रवद्र्धनलगायत उद्देश्यसहित आज एक कार्यक्रमबीच मोर्चा घोषणा गरिएको हो ।
मोर्चामा उपेन्द्र यादव अध्यक्ष रहेको जनता समाजवादी पार्टी ९जसपा० नेपाल, महन्थ ठाकुर नेतृत्वको लोकतान्त्रिक समाजवादी पार्टी ९लोसपा० नेपाल, सिके राउत अध्यक्ष रहेको जनमत पार्टी, रञ्जिता चौधरी अध्यक्ष रहेको नागरिक उन्मुक्ति पार्टी, राजेन्द्र महतो नेतृत्वको राष्ट्रिय मुक्ति पार्टी नेपाल, हृदयेश त्रिपाठी नेतृत्वको जनता प्रगतिशील पार्टी तथा वृषेशचन्द्र लाल नेतृत्वको तजनता प्रगतिशील पार्टी रहेका छन् ।
विभिन्न २६ बुँदे उद्देश्य र प्रतिबद्धतासहित मोर्चा घोषणा गरिएको हो । मोर्चाको मुख्य उद्देश्य सामथ्र्य र पहिचानका आधारमा प्रदेशको सीमाङ्कन, नामाङ्कन तथा संरचना गर्नरगराउन तथा राजस्व तथा स्रोत साधन सन्तुलित र न्यायोचित रूपमा बाँडफाँट गर्ने, राज्यका तर्फबाट प्रदान गरिने सेवा, सुविधा जनता माझ पुर्याउन प्रदेशलाई सक्षम बनाउनुपर्ने र स्थानीय तहलाई प्रदेशको क्षेत्राधिकारभित्र रहने गरी सङ्घीय लोकतान्त्रिक गणतन्त्रात्मक प्रणालीलाई समृद्ध पार्ने, सङ्घ र प्रदेश सरकारबीचको क्षेत्राधिकारलाई स्पष्ट पार्ने रहेको छ ।
यस्तै सङ्घ र प्रदेशबीच स्रोतसाधनको न्यायोचित वितरण, सङ्घीयताको मूल्य र मान्यताअनुरुप बाँडफाँटको नीति निर्माण गरी कार्यान्वयन गराउने, प्रहरी समायोजन ऐन, २०७६ बमोजिम गर्ने र यथाशीघ्र सङ्घीय निजामती ऐन निर्माण गरी कर्मचारी समायोजनसम्बन्धी कार्य सम्पन्न गर्ने उल्लेख छ । मोर्चाले १३ बुँदे आचारसंहिता पनि जारी गरेको छ ।
कुलमान घिसिङलाई विद्युत् प्राधिकरणमा पुनस्थापना गर्न सर्वोच्चले दिएन आदेश
सर्वोच्च अदालतले कुलमान घिसिङको पुनस्थापनाका लागि अन्तरिम आदेश दिन अस्वीकार गरेको छ ।
बिहीबार न्यायाधीश कुमार चुँडाल र नित्यानन्द पाण्डेको संयुक्त इजलासले विगतमा हितेन्द्रेव शाक्यले पनि पदमुक्त भएको र अदालतले उनलाई पुनस्थापना नगरेको नजिर टेकेर सर्वोच्चले कुलमानलाई अन्तरिम आदेश दिन अस्वीकार गरेको हो ।
उक्त मुद्दालाई अग्राधिकार दिएर पूर्ण इजलासमा पठाउने आदेश भएको छ । हितेन्द्रले दायर गरेको सेवा सुविधासम्बन्धी रिटमा पनि अदालतले अन्तरिम नदिएको सर्वोच्च अदालतले जनाएको छ ।
घिसिङले आफ्नो पदाधिकार बाँकी छँदै सरकारले बदनियतपूर्वक हटाएको भन्दै थमौतीको अन्तरिम आदेश माग गर्दै रिट दायर गरेका हुन् ।शाक्यले भने चार वर्षअघि आफूलाई निकालेर घिसिङको नियुक्ति नै गलत भएको भन्दै त्यतिबेला रिट दायर गरेका थिए ।
कुलमानलाई नेपाल विद्युत् प्राधिकरणको कार्यकारी निर्देशकबाट हटाइएपछि सडक र सदनमा सरकारको विरोध समेत गरिएको थियो ।
वायु प्रदुषण रोक्न सरकारले आवश्यक निर्णय गर्छ : प्रकाशमान सिंह
कार्यवाहक प्रधानमन्त्री प्रकाशमान सिंहले काठमाडौं उपत्यकाको वायु प्रदुषण रोक्न सरकारले यथाशक्य छिटो निर्णय गर्ने बताएका छन् ।
बिहीवार काठमाडौं उपत्यकाको वायु प्रदुषण कम गर्न विज्ञहरुको सुझाव लिँदै कार्यवाहक प्रधानमन्त्री सिंहले यस्तो बताएका हुन् । उनले विज्ञहरुको सुझावका आधारमा अन्य सरोकारवाला निकायहरुसँग समेत छलफल गरेर अघि बढ्ने बताए । उद्योगधन्दा र कलकारखानाहरुको माध्यमबाट भइहरको वायु प्रदुषण रोक्न आवश्यक पहल गर्ने मन्त्री सिंहको भनाइ छ ।
उनले भने, ‘चाँडै अन्य सम्बन्धीत निकायहरुसँग समेत छलफल गरेर तत्काल गर्नुपर्ने कामहरु सरकारले गर्छ । विज्ञको सुझावका आधारमा वायु प्रदुषण कम गर्न तत्काल निर्णय गर्छौं ।’
काठमाडौमा वायु प्रदुषणले खतराको तह पार गरेपछि सरकारले प्रदुषण कम गर्न विज्ञको सुझाव लिएको हो । विज्ञहरुले वायु प्रदुषण कम गर्न हप्तामा दुई दिन सार्वजनिक विदा दिन सुझाएका छन् ।
संविधान भित्रै समस्याको समाधान खोजौँ,हिंसात्मक गतिविधि स्विकार्य छैन : डा.शेखर कोइराला
नेपाली कांग्रेसका नेता डा.शेखर कोइरालाले अहिलेको संविधान भित्रै रहेर सबै समस्याको समाधान खोज्नुपर्ने बताएका छन् ।
मोरङको बुढिगंगा गाउँपालिका–१ मा निमार्ण गर्न लागिएको बुढिगंगा पार्कको बिहीबार शिलान्यास गर्दै उनले संविधानभित्र रहेर शान्तीपुर्ण आन्दोलन गर्ने अधिकार सबैलाई रहेको बताए ।
कोइरालाले कुनै प्रकारको हिंसा, आतंक तोडफोड, आगजनी नेपाली कांग्रेसलाई स्विकार्य नहुने समेत प्रष्ट पारे । नेता कोइरालाले गत शुक्रबार काठमाडौमा भएको घटनाको निष्पक्ष छानविन गर्नुपर्नेमा समेत जोड दिए । नेपाली जनतालाई विश्वास दिलाउँन छानविन समिति वनाएर सो घटनाको जति सक्दो चाँडो सरकारले छानविन गर्नुपर्ने उनको भनाई थियो ।
उनले यो व्यवस्थालाई बलियो र दिगो बनाउन राजनितिक दलहरु पनि सुध्रनु जरुरी रहेको बताए । उनले अहिलेको अवस्थामा राजनितिक दलहरुले आफुलाई सुर्धादै जनताका मन जित्न सक्नुपर्नेमा जोड दिए ।
नेता कोइरालाले नेपाली कांग्रेस र नेकपा एमाले दुई ठुला दल मिलेर सरकार निमार्ण गर्दा संविधान संशोधन, सुशासन, आर्थिक विकास, सुशासन तथा रोजगारी सृजना गर्ने कुरा गरेपनि त्यसो हुन नसेको बताए ।
जति सक्दो चाँडो आफुले गरेको प्रतिवद्धता पुरा गर्ने तर्फ दलहरुको ध्यान जानुपर्ने कोइरालाको भनाई थियो । उनले नेपालमा कृषि, जलविद्युत, जडिवुटि तथा पर्यटनको प्रसस्त संभावना रहेकाले त्यस्को उचित सदुपयोग गरेर युवाहरुलाई स्वरोजगार बनाउदै नेपाल नेपाली जनतालाई सुखी र समृद्ध बनाउन सकिने बताए ।
सरकारले सुशासन कायम गर्न नसक्दा लुटतन्त्र र विचौलियातन्त्रको बिगबिगि बढ्यो : उपेन्द्र यादव
जनता समाजवादी पार्टी, नेपालका अध्यक्ष उपेन्द्र यादवले वर्तमान सरकार पूर्णतः असफल भएको बताएका छन् ।
बिहीवार मधेसकेन्द्रित सात दलको संघीय लोकतान्त्रिक मोर्चा कार्यक्रमको घोषणा समारोहमा बोल्दै अध्यक्ष यादवले यस्तो बताएका हुन् । उनले वर्तमान सरकार गठन भएको ९ महिना बितिसक्दा समेत मुलुकमा सुशासन कायम, भ्रष्टाचार नियन्त्रण र अर्थतन्त्रमा कुनै सुधार गर्न नसकेको टिप्पणी गरे ।
उनले सरकारले मुलुकमा सुशासन कायम गर्न नसक्दा लुटतन्त्र र विचौलियातन्त्रको बिगबिगि रहेको बताए । सरकारकै असफलताका कारण प्रतिगमनकारी शक्तिहरु व्यवस्था ढाल्ने दुस्साहस गरिरहेको उनको भनाइ छ ।
उनले भने, ‘सरकार गठन भएको आज झण्डै नौ महिना बितिसकेको भएपनि न सुशासन न भ्रष्टाचार नियन्त्रण न आर्थिक सुधार भयो । संविधान संशोधन गर्छौं भनेर आएको प्रधानमन्त्रीले ०८७ मा संविधान संशोधन गर्ने । जबकि यो सरकारको र संसदको दुई अढाई वर्ष मात्रै बाँकी छ । त्यसकारण सबै क्षेत्रबाट असफल भइसकेको कारणबाट सरकार झन कमजोर भएको छ, भ्रष्टाचार बढिरहेको छ । लुटतन्त्र र विचौलियातन्त्रको बिगबिगि छ । जसबाट जनता आक्रोशित छ । यस्तो अवस्थामा प्रतिगमनकारी शक्तिहरुले संघीय लोकतान्त्रिक गणतन्त्रलाई सिध्याउने प्रयासमा लागेका छन् ।’
संघीय लोकतान्त्रिक गणतन्त्रको रक्षा र संस्थागत गर्न तथा राष्ट्रिय समस्याको समाधान गर्न सात दलीय मोर्चा गठन गरिएको उनको दाबी छ ।
अवरोधका बिच प्रमुख प्रशासकीय अधिकृत गुरागाईंले कार्यालय पुगेर हाजिर गरे
काठमाडौँ महानगरपालिकाका प्रमुख प्रशासकीय अधिकृत सरोज गुरागाईँले कार्यालय पुगेर हाजिर गरेका छन् । उपप्रमुख सुनिता डंगोल तथा महानगरका कर्मचारीहरूको सहयोगमा उनले हाजिर गरेका हुन् ।
साढे तीन महिनादेखि प्रमुख प्रशासकीय अधिकृतविहीन हुँदा महानगरका कर्मचारीहरू तलब पाउनबाट वञ्चित भएका थिए । यसअघि प्रमुख प्रशासकीय अधिकृत गुरागाईं कार्यालय प्रवेश गर्न खोज्दा नगर प्रहरी र कर्मचारीबिच तनाव उत्पन्न भएको थियो ।
कर्मचारी र जनप्रतिनिधिले घेराउमा राखेर गुरागाईंलाई कार्यकक्षतिर लगेका थिए । प्रमुख बालेन्द्र साहको निर्देशनमा प्रमुख प्रशासकीय अधिकृतको कोठामा तालासमेत लगाइएको थियो तर कर्मचारीहरूले ताल फोडेर गुरागाईंलाई हाजिर गराएका हुन् ।
प्रमुख बालेन्द्र साहले गुरागाईंलाई गत पुस ७ गतेदेखि बिदामा राखेका थिए ।
नेपालमा लगानी गर्न थाइ लगानीकर्तालाई प्रधानमन्त्रीको आह्वान
प्रधानमन्त्री केपी शर्मा ओलीको थाइलाइन्ड भ्रमणको तेस्रो दिन थाइलाइन्डका र नेपालका व्यवसायीहरूसँग छलफल गरेका छन् ।
सो क्रममा नेपालमा लगानीका सम्भावना, अवसरकाबारे सहकार्यका विषयमा छलफल भएको छ । नेपालमा लगानीको सम्भावना र अवसरकाबारेमा प्रधानमन्त्रीले नेपाल र थाईल्याडका व्यापरीबीच छलफल गरे ।
प्रधानमन्त्रीका आर्थिक सल्लाहाकार डाक्टर युवराज खतिवडाले दुई देशका व्यपारीहरुको छलफलमा लगानीका विविध आयामका विषयमा छलफल भएको बताए ।
उनकाअनुसार छलफलका क्रममा लगानी मात्रै नभई भावनात्मक रूपमै सहकार्य गर्न नेपाल तयार रहेको सन्देश थाइका उद्योगी व्यापारीसहित लगानीकर्ताहरूलाई दिए ।
निर्माण उद्योग, होटल व्यवसायी, खाद्य प्रशोधन, पर्यटनसँग सम्बन्धित लगानीकर्ताहरू छलफलमा सहभागी थिए । उनीहरुले नेपालमा लगानी गर्न आतुर रहेको बताएका थिए ।
छलफलबारे जानकारी दिँदै खतिवडाले भने– ‘निर्माण उद्योग, होटल व्यवसायी, खाद्य प्रशोधन, पर्यटनसँग सम्बन्धित लगानीकर्ताहरू छलफलमा सहभागी हुनुहुन्थ्यो । उहाँहरुले नेपालमा लगानी गर्न आतुर रहेको बताउनु भयो । त्यसका लागि उपयुक्त पार्टनहरुको खोजी हामी गर्छौं भनेर थाइ लगानीकर्ताले गर्नुभएको छ । लगानी गरिसकेपछि विदेशी मुद्रा फर्काउनेबारे नेपालमा रहेको व्यवस्थाका बारेमा चासो रह्यो । कर्मचारी प्रशासनले दिने दुख, झन्झटिलो व्यवस्थालाई हटाउन, भन्सारका दरहरू घटाएर व्यवस्थित गर्न समेत लगानीकर्ताले जोड दिनुभयो ।’
छलफलमा सहभागी नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानी गर्नुपर्ने क्षेत्रहरूका बारेमा छलफल भएको बताए । उनका अनुसार ती क्षेत्रमा लगानीका लागि प्रधानमन्त्री ओलीले आह्वान गरे ।
छलफलका क्रममा नेपाल उद्योग वाणिज्य महासंघको तर्फबाट ढकालले आफ्नो भनाइ राख्दै कानुनहरू संशोधन पछि लगानीमा सहज बनाएको र थाइ व्यवसायीलाई नेपालमा लगानीका लागि सहज रहेको बताए ।
उनले भने– ‘नेपालमा इनभेष्ट गर्नुपर्ने जतिपनि सेक्टर छन् ती सेक्टरमा लगानी गर्न प्रधानमन्त्रीले आह्वान गर्नुभयो । धेरैजसो लगानीसम्बन्धी कानुनहरू परम्परागत थिए, ती लगानीका लागि बाधक थिए, ती सबै कानुनहरू लाई संशोधन गरेर सहज बनाइएको अवस्था छ, सरकारको कमिटमेन्ट इन्सोरेन्स गर्ने भन्ने छ, त्यसले थाई व्यवसायीहरूलाई नेपालमा लगानी गर्न प्रोत्साहन गरेको छ ।’
छलफलका क्रममा थाइ व्यवसायीहरूले पर्यटन, होटल, हस्पिटल, निर्माणजन्य कच्चा पदार्थ जस्ता नेपालमा सम्भावित लगानीका क्षेत्रमा लगानी गर्न चासो देखाएका थिए ।
लगानी गर्नका लागि कानून सहज भएरनभएको, लगानी पछि मुनाफा फिर्ता लैजाने कानूनी प्रबन्ध के कस्तो रहेको बारे चासो राखेका थिए । नेपालमा विदेशी मुद्रको सहजता, रिजर्भहरू के कस्तो छ, भन्ने उनीहरूको चासो थियो ।
थाइ व्यवसायी तथा लगानीकर्ताहरूलाई नेपाली व्यवसायीको प्रतिनिधिमूलक टोलीले नेपालमा लगानीका लागि धेरै सम्भावना रहेको बताएको थियो ।
जलविद्युत क्षेत्रमा भारतसँग १० हजार मेगावार्टको सम्झौता भएको थियो । सोही अनुसार उत्पादन गर्नुपर्ने अवस्था, पर्यटन क्षेत्रमा प्रवर्धन गर्नका लागि पनि नेपालमा प्रर्चुर सम्भावना रहेको छलफलमा राखिएको ढकालले जानकारी दिए ।
नेपालमा सुनको मूल्य तोलामा १ लाख ८० हजार नाघ्यो
नेपाली बजारमा आज सुनको मूल्यले नयाँ रेकर्ड बनाएको छ । केही दिनदेखि निरन्तर रेकर्ड बनाएको सुनको मूल्य बुधबार घटेको थियो ।
तर, बिहीबार तोलामा १ हजार २ सय रुपैँयाले बढेर नयाँ रेकर्ड बनाएको हो । नेपाल सुनचाँदी व्यवसायी महासंघका अनुसार बिहीबार छापावाल सुनको मूल्य तोलाको १ लाख ८० हजार ३ सय रुपैयाँमा कारोबार भइरहेको छ । यो हालसम्मकै उच्च हो ।
अघिल्लो कारोबार दिन बुधबार सुन तोलामा १ लाख ७९ हजार १ सय रुपैयाँका कारोबार भएको थियो । दीको मूल्य भने २५ रुपैयाँले घटेर १ हजार ९ सय ९५ रुपैयाँमा कारोबार भइरहेको छ । बुधबार चाँदी २ हजार २० रुपैयाँमा कारोबार भएको थियो ।
नेपाल सुपर लिग : काठमाडौं र झापाले अंक बाँडे
काठमाडौं रेजर्स र झापा एफसीले नेपाल सुपर लिग (एनएसएल) को तेस्रो संस्करणको लगातार दुई खेलमा बराबरीको नतिजा सामना गरेको छ ।
त्रिपुरेश्वरस्थित दशरथ रंगशालामा बिहीबार भएको खेलमा काठमाडौं र झापाले गोलरहित खेलेका हुन् । दुवै टिम पहिलो जित निकाल्ने लक्ष्यमा थिए । पहिलो खेलमा काठमाडौं ललितपुर सिटी एफसीसँग २–२ गोलको बराबरीमा रोकिएको थियो ।
झापाले पनि बुटवल लुम्बिनीसँग गोलरहित बराबरी खेलेको थियो । त्यसैले दुवै टोली तीन अंक ल्याउने लक्ष्यसहित बिहीवार मैदान उत्रिएका थिए । तर सफल हुन सकेन । पहिलो हाफमा काठमाडौंले र दोस्रो हाफमा भने झापा आक्रमणमा हाबी भएको थियो । खेलको पाँचौं मिनेटमा काठमाडौंको अग्रता लिने प्रयासमा माथिल्लो बारमा लागेर बाहिरिँदा असफल भयो ।
मध्यभागबाट बल लिएरअगाडि बढेका मोहमेद बुया टुरेले पेनाल्टी बक्सभित्रबाट गरेको सशक्त प्रहार बारमा लागेर बाहिरिएको हो । २७औं मिनेटमा नेपाली राष्ट्रिय फुटबल टिमका स्ट्राइकरसमेत रहेका जिलेस्पीजंग कार्कीको प्रहार आकासिँदा काठमाडौंले अर्को अवसर गुमाउन पुग्यो । अमान्डो डियोपले कट ब्याकमा दिएको पासमा उनको प्रहार सफल भएन ।
पहिलो हाफमा खासै राम्रा अवसर बन्न सकेन । झापाको भने कुनै पनि आक्रमण सफल देखिएन । दोस्रो हाफको सुरुमा नै झापाले उत्कृष्ट अवसर बुन्यो । ४६औं मिनेटमा झापका आर्सिक लाजेको आक्रमण पनि सफल भएन ।
१८ यार्डबाट उनले गरेका सशक्त प्रहार काठमाडौंका गोलकिपर अभिशेक बरालले पन्च गर्दै बाहिर पठाए । काठमाडौंका डियोपले ६६औं मिनेटमा वान टचमार्पm गोल गर्ने सुन्दर अवसर खेर फाले । लेफ्ट साइडबाट जिलेस्पीले दिएको क्रसलाई पेनाल्टी बक्समा अनमार्क डियोपले भेट्टाउन नै सकेनन् ।
७० औं मिनेटमा झापाका अलहाजी गेरोले पनि अवसर गुमाए । करिब २५ यार्डबाट ड्रिब्लिङ गर्दै उनले पेनाल्टी बक्सबाट गरेको प्रहार पोस्टको दिशामा रहन सकेन । झापाका अर्सिकले ८३औं मिनेटमा गरेको फ्रिकिक दोस्रो बारनजिकैबाट बाहिरिन पुग्यो । चार मिनेटपछि नै उनको अर्को आक्रमणलाई काठमाडौंका गोलकिपर अभिशेकलाई खासै चुनौती भएन ।
८०औं मिनेटमा एरोन थापाको उत्कृष्ट सट पनि बारमा लागेर फर्किंदा झापाले अग्रता लिने अवसर गुमायो । राइट साइडबाट आरोनले ड्रिब्लिङ गर्दै नजिकैबाट गरेको प्रहार बारमा लागेको हो । खेलको अन्तिम समयमा लाकेन लिम्बूले गरेको लामो दूरीबाट गरेको प्रयास पनि सफल हुन सकेन । यससँगै खेल बराबरीमा नै सकियो ।
अफगानिस्तानसंग १ सय ३० रनले हार्यो नेपाल
नेपाली यु–१९ राष्ट्रिय क्रिकेट टोली अफगानिस्तानको यु–१९ टोलीसँग पराजित भएको छ । माथिल्लो मुलपानी क्रिकेट मैदानमा आज भएको खेलमा नेपाल अफगानिस्तानसँग १३० रनको फराकिलो अन्तरले पराजित भएको हो । जितसँगै अफगानिस्तानले तीन खेलको शृङ्खलाको अभ्यास खेलमा १–० को अग्रता बनाएको छ ।
अफगानिस्तानले दिएको ३०१ रनको लक्ष्य पछ्याएको नेपाल ४६ दशमलव २ ओभरमा सबै विकेट गुमाउदै १७० रनमा समेटियो । नेपालका लागि ओपनर निरजकुमार यादवले ६१ बलमा ४ चौका र २ छक्काको सहयोगमा ५३ रनको अर्धशतकीय पारी खेले भने सन्तोष यादवले ३९ बलमा १ चौकाको सहयोगमा २४ रन बनाए । त्यस्तै अशोक धामीले २४, अभिषेक तिवारीले १७ तथा कप्तान नरेन भट्टले १३ रन जोडे ।
नेपाललाई १७० रनमा समेट्नेक्रममा अफगानिस्तानका वाहिदुल्लाह जाद्रान, जियाउल्लाह शाहीदी र मेहबुब खानले समान दुई ÷दुई विकेट लिए । त्यस्तै अब्दुल अजिज, नोरिस्तानि उमजाईं र नजिफुल्लाह अमिरिले समान एक ÷एक विकेट लिए ।
त्यसअघि टस जितेर पहिले ब्याटिङ रोजेको अफगानिस्तानले निर्धारित ५० ओभरमा ९ विकेट गुमाएर ३०० रन बनाएको थियो । अफगानिस्तानका लागि फैसल खान शिनोजादाले सर्वाधिक ९७ रनको योगदान दिए । उनले ८८ बलमा ९ चौका र चार छक्काको मद्दतमा ९७ रन बनाएका हुन । त्यसैगरी खालिद अहमदजाईले १०७ बलमा ६ चौकासहित ७६, बर्खत इब्राहिमजाईले ३५, उजाइरुल्लाहले २४, अजिज मिय खहिलले २१ र नजिफउल्लाह अमिरीले १० रन बनाए ।
नेपालका लागि सन्तोष यादवले तीन विकेट लिए भने अभिषेक तिवारीले दुई तथा दयानन्द मण्डल र विपिनप्रसाद शर्माले समान एक÷एक विकेट लिए । नेपाल र अफगानिस्तान यु १९ पुरुष विश्वकपको एसिया छनोटको तयारीमा छन् । जसअन्तर्गत छनोटअघि दुवै टोलीले तीन खेलकोे अभ्यास शृङ्खला खेल्न लागेका हुन् । अब उक्त शृङ्खलाको दोस्रो खेल यही चैत २४ गते हुनेछ ।
मकालु खबर
