रास्वपा सचिवालयले गर्यो ४ निर्णय- कार्यवाहक सभापतिको जिम्मेवारी अर्याललाई
मकालु खबर
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने पक्राउ परेपछि पार्टीको नेतृत्व अस्थायी रूपमा उपसभापति डिपी अर्यालले सम्हाल्ने भएका छन् । मध्यरातमा भर्चुअल माध्यमबाट बसेको पार्टीको केन्द्रीय सचिवालय बैठकले अर्याललाई कार्यवाहक सभापतिको जिम्मेवारी दिने निर्णय गरेको हो ।
रास्वपाले शुक्रबार उच्च अदालत तुलसीपुरको बुटवल इजलासले दिएको आदेशलाई कानुनको एक तहको निर्णयका रूपमा लिएको जनाएको छ । सोही सन्दर्भमा पार्टीले चितवनको भरतपुरमा आयोजना गर्न लागिएको जनयात्रा सभालाई पूर्वनिर्धारित तालिका अनुसार नै सञ्चालन गर्ने र सफल बनाउने निर्णय गरेको छ । जनयात्रा सभा शनिबार दिउँसो २ बजेका लागि तय गरिएको छ ।
पार्टीले सभापति लामिछानेलाई पक्राउ गर्ने क्रममा प्रहरीले देखाएको तरिका प्रति आपत्ति जनाउँदै, अदालतको आदेशपछि घरभित्र पसेर पूर्जी लेख्ने कार्यलाई अनौठो र गैरकानुनी भन्दै आपत्ति जनाएको छ । रास्वपाले उक्त व्यवहार विधिको शासनविपरीत भएको र कुनै पनि अवस्थामा स्वीकार्य नहुने जनाएको छ ।
यस्ता छन् सचिवालय बैठकका ४ निर्णय :-
- उच्च अदालत तुलसीपुर बुटवल इजलासले पार्टी सभापति रवि लामिछानेज्यूको सम्बन्धमा जुन निर्णय गरेको छ, त्यो निर्णयलाई कानुनको एक तहको निर्णयको रूपमा बुझ्दै, पार्टी सभापति रवि लामिछानेज्यूले आफ्नो भिडियो सन्देशमा भन्नुभएझैं, अदालत र अदालतको निर्णयको सदैव सम्मान गर्ने । साथै, अदालत, संविधान र कानुनमा आधारित रही अर्को तह र ढोकामा न्यायको लागि अघि बढ्ने ।
- पक्राउ पुर्जी नलिएरै पक्राउ गर्न आउने कुरा मात्र होइन, सभापतिज्यूको घरमा – त्यो पनि बेडरुमभित्र बसेर – जुन किसिमले पूर्जी लेख्ने अनौठो अभ्यास प्रहरीले गर्यो, विधिको शासनमा त्यो क्षम्य हुन सक्दैन । नागरिकको घरभित्र छिरेर कानुनी कागजात बनाउने गैर-संवेदनशील र गैरकानुनी कुराको भत्सर्ना गर्ने ।
- आज चैत्र २३ गते शनिबार २ बजे भरतपुर, चितवनमा आयोजना हुन लागेको जनयात्रा शुभारम्भ सभालाई भव्य रूपमा सफल पार्ने । राज्यले विवेक गुमाएको बेला हामीले विवेक गुमाउनु हुँदैन र हामीले गर्ने सभा शान्त र सौम्य हुनुपर्छ भन्ने सभापतिको निर्देशनबमोजिम सभालाई शान्तिपूर्ण बनाउन तथा हुन सक्ने सम्भावित घुसपैठ, चलखेल तथा बिथोल्ने प्रयासहरू रोक्नका लागि सबै सदस्यहरूलाई सचेत, संयमित र गम्भीर रहन निर्देशन दिने ।
- पार्टी सभापति रवि लामिछानेले पार्टीको नेतृत्व जिम्मेवारीको लागि कार्यवाहक सभापतिमा उपसभापति डिपी अर्यालज्यूलाई तोकेकोमा त्यसलाई अनुमोदन गर्ने ।
मकालु खबर
