काठमाडौंमा आज बिहानैदेखि मेघगर्जनसहित वर्षा, वायुप्रदूषण हट्ने आकलन

काठमाडौं । अविरल वायुप्रदूषणको चपेटामा परेको काठमाडौं उपत्यकामा करिब दुई सातापछि वर्षा भएको छ । बुधबार हल्का वर्षा भएको उपत्यकामा आज बिहानैदेखि मेघगर्जनसहित पानी परिरहेको हो ।

२७ दिनको खडेरीपछि परेको पानीले प्रदूषण कम हुने अपेक्षा गरिएको छ । मौसम पूर्वानुमान महाशाखाका मौसमविद् गोविन्द झाले पानी पर्ने क्रम आज र भोलि पनि जारी रहने बताए । ‘आजको पानीले थोरै राहत मिल्नेछ, तर भोलिसम्मको वर्षाले प्रदूषण अझै हटाउने आशा गरिएको छ,’ उनले भने ।

अहिले काठमाडौं उपत्यकासँगै झापा, सुनसरी, सिन्धुपाल्चोक, सल्यान, दाङलगायत पूर्वदेखि सुदूरपश्चिमसम्मै मेघगर्जन र चट्याङसहित हल्का वर्षा भइरहेको छ । हालको वर्षा पश्चिमी वायु, स्थानीय वायुसँगै बंगालको खाडीबाट आएको जलवाष्पयुक्त हावाको कारणले भएको हो । मौसमविद्हरूका अनुसार यो प्रणाली शुक्रबारसम्म सक्रिय रहनेछ ।

लामो समयको सुक्खा र खडेरीले आहत भएकाहरुलाई यो वर्षाले केही राहत दिएको छ । वायु गुणस्तर सूचकांक (AQI) सोमबारसम्म २०० माथि रहेकामा मंगलबार केही घटेको थियो भने बुधबार १८६ मा झरेको छ । यद्यपि यो अझै पनि ‘अस्वस्थकर’ श्रेणीमै पर्दछ, तर अघिल्लो साताको तुलनामा केही सुधार देखिएको छ । अबको वर्षाले उपत्यकावासीलाई वायुप्रदूषणबाट राहत मिल्ने आशा गरिएको छ ।