विद्यालय भर्ना अभियान सुरु, शिक्षकहरू १२ दिनदेखि सडकमा

काठमाडौं । नयाँ शैक्षिक सत्र २०८२ सँगै नेपालभर विद्यालय भर्ना अभियान आजदेखि सुरु भएको छ । ‘सबै बालबालिकाको विद्यालयमा सहभागिता, गुणस्तरीय शिक्षाको सुनिश्चितता’ भन्ने नाराका साथ सुरु गरिएको यस अभियानलाई सफल पार्न नेपाल सरकारले सम्पूर्ण अभिभावक, समुदाय तथा सरोकारवाला निकायहरुलाई आह्वान गरेको छ ।

प्रधानमन्त्री केपी शर्मा ओलीले शुभकामना सन्देश दिँदै सबै अभिभावकलाई विद्यालय जाने उमेरका बालबालिकालाई नजिकको विद्यालयमा भर्ना गराई नियमित रूपमा पढ्न पठाउन आग्रह गरेका छन् । उनले शिक्षा क्षेत्रलाई समृद्ध नेपालको आधार भन्दै गुणस्तरीय र रोजगारमुखी शैक्षिक जनशक्ति उत्पादनमा सबैको सक्रियता आवश्यक रहेको बताए । साथै, सरकारले शिक्षा क्षेत्रमा थप बजेट विनियोजन गर्ने, विद्यालय शिक्षा विधेयक २०८१ लाई छलफलमार्फत अघि बढाउने र दिगो विकास लक्ष्यहरू प्राप्त गर्न कटिबद्ध रहेको प्रधानमन्त्री ओलीको भनाइ छ ।

यसैबीच, देशभरका शिक्षक तथा कर्मचारीहरू नयाँ शिक्षा ऐनको माग गर्दै आन्दोलनरत रहेका बेला प्रधानमन्त्रीको यो भनाइ आएको हो । प्रधानमन्त्री ओलीले गरिबी नहटाइ समृद्ध नेपाल निर्माण असम्भव भएको उल्लेख गर्दै भने, ‘गरिबी निवारणको पहिलो सर्त भनेकै शिक्षा हो ।’ अहिले पनि करिब २० प्रतिशत जनसंख्या गरिबीको रेखामुनि रहेको तथ्यांक उल्लेख गर्दै उनले बालबालिकालाई विद्यालयबाहिर राख्न नहुने स्पष्ट पारे ।

हाल आधारभूत तहमा विद्यार्थीको भर्नादरमा सुधार देखिए पनि उनीहरूको निरन्तरतामा अझ धेरै प्रयास आवश्यक रहेको प्रधानमन्त्रीको भनाइ छ । उनले स्थानीय ज्ञान, सीप र प्रविधिसँग शिक्षालाई जोड्दै आधुनिक बनाउनु आवश्यक रहेको बताए । ‘देशमै रोजगारी र स्वरोजगारका अवसर सिर्जना गर्न प्राविधिक तथा व्यावसायिक शिक्षामा लगानी बढाउनु आजको आवश्यकता हो,’ प्रधानमन्त्री ओलीले भने ।

शिक्षक तथा विद्यालय कर्मचारीको ऐनका लागि संघर्ष जारी
आज देशभर नयाँ वर्षको उत्सव मनाइँदैछ, त्यही समयमा नेपालका शिक्षक तथा विद्यालय कर्मचारी भने विद्यालय शिक्षा ऐन जारी गराउन दबाब दिँदै सडकमा संघर्षरत छन् ।

नेपाल शिक्षक महासंघका अध्यक्ष लक्ष्मीकिशोर सुवेदीका अनुसार, यो नयाँ वर्षको सुरुवात पनि आन्दोलनमै बित्न लागेको छ । उनले भने, ‘हामीले यो नयाँ वर्षलाई उत्सवभन्दा पनि विद्यार्थी, शिक्षक र विद्यालय शिक्षाको भविष्य सुनिश्चित गर्नको लागि समर्पित गरेका छौं ।’

शिक्षकहरूको आन्दोलन काठमाडौंको माइतीघर–बानेश्वर क्षेत्रमा निरन्तर चलिरहेको छ । उनीहरूका अनुसार, माग पूरा नभएसम्म न त थकाइको कुरा हुन्छ, न त विचलनको – केवल जितका लागि अघि बढ्ने अठोट लिएका छन् । सुवेदीले सरकारलाई विगतका सहमतिहरू कार्यान्वयन गर्न र छिटो विद्यालय शिक्षा ऐन ल्याउन आग्रह गरे ।

उनले अन्य शिक्षक तथा कर्मचारीलाई पनि आन्दोलनमा एकजुट हुन अपील गरेका छन् । शिक्षक तथा विद्यालय कर्मचारीहरूले चैत २० गतेदेखि आन्दोलन सुरु गरेका हुन् । उनीहरूको मुख्य माग भनेको शिक्षा ऐन तुरुन्त जारी गरी विद्यालय शिक्षालाई स्पष्ट र प्रभावकारी बनाउनु हो ।