प्रचण्डलाई देउवाको बेवास्ता, पूर्वराजाप्रति एमाले आक्रामक, चम्किए युवराज

प्रचण्डले भेट्न खोजे, देउवाले मानेनन्

नेपाली कांग्रेसका सभापति शेरबहादुर देउवाले नेकपा माओवादी केन्द्रका अध्यक्ष पुष्पकमल दाहाल प्रचण्डले राखेको प्रस्ताव अस्वीकार गरेका छन् । माओवादी अध्यक्ष प्रचण्डले नयाँ सरकार गठनका लागि भेट्ने प्रस्ताव गरेका थिए । तर, सभापति देउवाले ठाडै अस्वीकार गरिदिएका छन् ।

स्रोतका अनुसार माओवादी अध्यक्ष प्रचण्ड वर्तमान ओली नेतृत्वको सरकार परिवर्तनका लागि दौडधुप गरिरहेका छन् । उनले कांग्रेस नेताहरूसँग नयाँ समीकरणका लागि छलफल पनि चलाइरहेका छन् ।
तर, सभापति देउवाले भने प्रचण्डको प्रस्तावलाई मतलब दिएका छैनन् । सभापति देउवाले प्रचण्डसँग भेट्न समेत मानेनन् ।

देउवा निकट एक नेताका अनुसार प्रचण्डले छलफलका लागि सन्देश पठाएका थिए । सभापति देउवाले भने वर्तमान सरकारलाई नै सफल बनाउने भन्दै भेट्न नमानेका हुन् ।

सभापति देउवाले प्रचण्डसँग भेटेमा गठबन्धनमा शङ्का पैदा हुने भन्दै भेट्न नचाहेका कांग्रेसका एक नेताले बताए ।

‘हामी स्थायित्वको पक्षमा छौँ । एमालेसँग सहकार्य गरेर सरकार बनाएका छौँ,’ सभापति देउवाले भनेका थिए ‘अहिले नै यो विषयमा छलफल गर्दिनँ, पहिले तपाईँसँग थिएँ, ओलीसँग भेटिनँ । अहिले ओलीसँग छु, तपाईँसँग भेट्दिनँ ।’

माओवादी अध्यक्ष प्रचण्डले नयाँ वर्षमा नयाँ सरकार बन्ने अभिव्यक्ति दिँदै आएका छन् ।

पूर्वराजाका गतिविधिको एमालेले गर्‍यो समिक्षा

नेकपा (एमाले)ले पूर्वराजा ज्ञानेन्द्र शाहका पछिल्ला गतिविधिहरूबारे समिक्षा गरेको छ ।

आज पार्टी कार्यालयमा बसेको सचिवालय बैठकले पूर्वराजा शाहका गतिविधिहरूबारे समिक्षा गरेको हो ।

शाहद्वारा आइतबार सार्वजनिक भिडियो सन्देशप्रति एमालेले आपत्ति जनाएको छ ।
एमाले उपमहासचिव प्रदीप ज्ञवालीले शाहमा अझै पनि प्राप्त उपलब्धि उल्ट्याउन सकिन्छ कि भन्ने सोच जीवितै रहेको निष्कर्ष निकालेको बताए ।

नेकपा (एमाले) ले पार्टी स्थापना दिवसमा कम्युनिस्ट आन्दोलनमा योगदान गर्ने ७ जनालाई ‘कम्युनिस्ट योद्धा’ का रूपमा सम्मानित गर्ने निर्णय गरेको छ ।

सोमवार पार्टी केन्द्रीय कार्यालय च्यासलमा बसेको सचिवालय बैठकले यस्तो निर्णय गरेको पार्टी उपमहासचिव ज्ञवालीले बताए ।

उनकाअनुसार वैशाख ९ गते पार्टी स्थापना दिवसमा सम्मानित हुनेहरूमा लालबहादुर विश्वकर्मा (कञ्चनपुर), स्वर्गीय रत्न शर्मा न्यौपाने (जाजरकोट), शोभारम बस्नेत (दाङ), बासस्वती देवकोटा (गोरखा), शान्ता मानवी (काठमाडौं), सत्यनारायण मण्डल (सप्तरी) र हरिचरण शिवाकोटी (झापा) रहेका छन् ।

पूर्वराजाको पक्षमा नाराबाजी गर्ने अमेरिकी नागरिक निष्कासित

पर्यटक भिसामा नेपाल आएर नेपालको सार्वभौममाथि प्रहार गरेको आरोपमा एक अमेरिकी नागरिकलाई निष्कासित गरिएको छ ।

नेपाल आएर राजसंस्थाका पक्षमा नाराबाजी गर्ने अमेरिकी नागरिकलाई सरकारले निष्कासित गर्ने निर्णय गरेको हो ।

गह मन्त्रालयले राजसंस्थाको पक्षमा नाराबाजी गर्नेक्रममा पक्राउ परेका अमेरिकी नागरिक ५८ वर्षीय जुलियन किर्पाललाई निष्कासित गर्ने निर्णय गरेको हो ।

किर्पाललाई नेपाल प्रवेशमा दुई वर्षको प्रतिबन्ध पनि लगाइएको छ । नेपालको राजनीतिक गतिविधिमा संलग्न भएको भेटिएपछि किर्पालविरुद्ध प्रतिबन्धसहितको डीपोर्ट गर्ने निर्णय गरिएको स्रोतले जानकारी दियो ।

किर्पाललाई भोलि (मंगलबार) अमेरिका फर्काइनेछ ।

माओवादी केन्द्रलाई जनताले भरोसा गरेका छन् : प्रचण्ड

नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले पछिल्लो समय जनताले माओवादी केन्द्रप्रति भरोसा गरेको बताएका छन् ।

आज साँझ नवलपरासी (बर्दघाट–सुस्तापूर्व) को गैँडाकोटमा आयोजित ‘जनतासँग माओवादी हुलाकी मार्ग केन्द्रित तराई–मधेस जागरण अभियान’ लाई सम्बोधन गर्दै अध्यक्ष दाहालले झापादेखि नवलपुरसम्म आउँदा माओवादी केन्द्रलाई जनताले भरोसा गरेको अनुभूति भएको बताए ।
उनले अहिले देशको राजनीति असहज अवस्थाबाट गुज्रिएकाले यसलाई सहज परिस्थिति बनाउन थुप्रै खबरदारी अभियान गरिएको उल्लेख गरे ।
माओवादी केन्द्रले झापाबाट सुरु गरेको अभियान कञ्चनपुरसम्म पुग्ने भएकाले हालसम्म लाखौँ जनताको सहभागिता रहेको उनको भनाइ छ ।

नयाँ वर्ष २०८२ मा ८८ दिन सार्वजनिक बिदा

काठमाडौं । नयाँ वर्ष २०८२ सालमा नेपालीहरूका लागि ८८ दिन सरकारी बिदा पर्न लागेको छ । नेपाल सरकारद्वारा राजपत्रमा प्रकाशित जानकारीअनुसार, यस वर्षमा ५२ वटा शनिबार नियमित बिदाको रूपमा रहनेछ ।

साथै, विभिन्न चाडपर्व र विशेष दिवसहरू मिलाएर थप ३६ दिन बिदा तय गरिएको छ । दशैँ र तिहारजस्ता ठूला चाडपर्वहरूलाई मात्र हेर्दा पनि जम्मा २८ दिन बिदा पर्ने देखिन्छ। यस्तै, गणतन्त्र दिवसलगायतका विभिन्न राष्ट्रिय दिवसहरूलाई समेट्दा ६ दिन बिदा छुट्याइएको छ । त्यति मात्र होइन, स्थानीय तहहरूले आफ्ना परम्परा र संस्कृतिअनुसार थप बिदा घोषणा गर्न सक्ने अधिकार समेत पाउने भएकाले बिदाको संख्या अझ बढ्न सक्ने सम्भावना छ । यसरी हेर्दा, २०८२ साल नेपालीहरूको लागि उत्सव र विश्रामले भरिएको वर्ष बन्ने देखिन्छ ।

सुनसरीको रासीमा अपरिचित व्यक्तिले चलायो गोली, दुई घाइते

सुनसरीको देवानगञ्ज गाउँपालिका–२ स्थित रासीमा आज साँझ गोली प्रहार हुँदा दुई जना घाइते भएका छन् ।

घाइते हुनेमा देवानगञ्ज–२ का २४ वर्षीय रवीन्द्र यादव र १ का शिवुकुमार मेहता रहेको जिल्ला प्रहरी कार्यालय सुनसरीका प्रहरी निरीक्षक दिनेश अधिकारीले जानकारी दिए ।

अपरिचित व्यक्तिको गोली लागेर घाइते भएका यादवको अवस्था सामान्य रहेको र उनको स्थानीय क्लिनिकमा उपचार भइरहेको प्रहरीले जनाएको छ ।

अर्का घाइते मेहता गम्भीर भएकाले विराटनगरस्थित नोबेल अस्पतालमा उपचार भइरहेको जिल्ला प्रहरी कार्यालय सुनसरीले जनाएको छ ।

तस्करीसँग सम्बन्धित गिरोहबीचको विवादकै कारण गोली चलेको र गोली प्रहारमा संलग्नको खोजी भइरहेको प्रहरीले जनाएको छ । घटनाको विषयमा थप अनुसन्धान भइरहेको प्रहरीको भनाइ छ ।

जाजरकोट भूकम्प : ३४ हजार निजी आवासको क्षति आँकलन

यही चैत मसान्तसम्ममा जाजरकोट भूकम्पबाट प्रभावित निजी आवासको क्षति आँकलन गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले ३४ हजार ३५ निजी आवासको विस्तृत क्षति आँकलन गरिएको विवरण आफ्नो प्रणालीमा प्रविष्ट भइसकेको जनाएको छ ।

प्राधिकरणका प्रवक्ता एवं उपसचिव रामबहादुर केसीले अझै क्षति आँकलनको काम भने जारी रहेको बताए । अब नयाँ वर्षसँगै जाजरकोट भूकम्पबाट क्षतिग्रस्त थप निजी आवासको क्षति आँकलनका लागि प्राधिकरण र मध्यपश्चिम विश्वविद्यालयबीच सम्झौता भएको उनले जानकारी दिए ।

यसका लागि हालै मात्र प्राधिकरणका कार्यकारी प्रमुख ई दिनेश भट्ट र विश्वविद्यालयको ग्राजुएट स्कुल अफ इञ्जिनियरिङका डिन सहप्राध्यापक डा राजन सुवालले यससम्बन्धी सम्झौता पत्रमा हस्ताक्षर गरेका छन् ।

कर्णाली प्रदेश राजधानी सुर्खेत वीरेन्द्रनगरमा अवस्थित विश्वविद्यालयले २८ हजार ३५७ परिवारको निजी घरको क्षति आँकलनका लागि ८५ जना प्राविधिक बाँकी स्थानीय तहहरूमा खटाउने छ ।

यसअघि, विस्तृत क्षति आँकलनका लागि प्राधिकरण र पुल्चोक इञ्जिनियरिङ क्याम्पसबीच सम्झौता भई विस्तृत क्षति आँकलन भएको थियो ।

टिकटक बनाउने क्रममा कालीगण्डकीमा एक महिला बेपत्ता

कालीगण्डकी नदी स्नान गरेर टिकटक बनाउने क्रममा बगेर एक महिला बेपत्ता भएकी छिन् ।

पर्वतको कुश्मा नगरपालिका–५ मोदीवेणीस्थित कालीगण्डकी नदी किनारमा स्नान गरेर फर्किने क्रममा भिडियो खिच्न लाग्दा पर्वतको महाशिला गाउँपालिका–५ घर भई पोखरा बस्ने ३५ वर्षीया विष्णु पन्त चिप्लिएर लड्दा नदीमा खसेकी थिइन् ।

बेपत्ता पन्तको खोजी जारी रहेको प्रहरीले जनाएको छ । जिल्ला प्रहरी कार्यालय पर्वत र सशस्त्र प्रहरी बल २५ नं गण चण्डिकाको टोलीले खोजीकार्य तीव्र बनाएको जिल्ला प्रहरी कार्यालय पर्वतका प्रहरी नायब उपरीक्षक रवीन विष्टले जानकारी दिए । प्रहरीको टोली खोजी गर्दै बिहादीसम्म पुगिसकेको छ ।

उनीसँगै उनकी दिदी र दुई छोरा समेत गएका थिए । उनीहरु भने सकुशल फर्किएको प्रहरीले जनाएको छ ।

नयाँ वर्ष तथा वैशाखे सङ्क्रान्तिको अवसरमा कालीगण्डकी स्नान गर्नका लागि विभिन्न जिल्लाका भक्तजनको घुइँचो लाग्छ ।

लियो सरकारको बजेट कार्यान्वयन फितलो

देशमा दुई तिहाइ नजिकको बलियो सरकार रहेपनि बजेट कार्यान्वयन भने फितलो देखिएको छ । चालु आर्थिक वर्ष २०८१÷८२ का लागि तत्कालीन अर्थमन्त्री वर्षमान पुनले गत जेठ ५ सरकारले १८ खर्ब ६० अर्बको बजेट ल्याएका थिए । बजेट कार्यान्वयन गर्न नपाउँदै उनको सरकार बहिर्गमनमा पर्यो । बजेट कार्यान्वयनको अघिल्लो दिन गत असार ३१ गते संसदको सबैभन्दा ठूलो दल नेपाली काँग्रेस, जसपा, लोसपासहितको समर्थनमा दोस्रोपटक एमाले अध्यक्ष समेत रहेका केपी ओली प्रधानमन्त्री बनेका थिए ।

प्रतिनिधि सभाको दुईवटा प्रमुख दल काँग्रेस र एमालेका सांसदको समर्थनमा शक्तिशाली सरकारलाई बजेट कार्यान्वयनको अविभारा थियो । शक्तिशाली गठबन्धन सरकार बजेट कार्यान्वयनमा नराम्रोसँग चुकेको छ । सरकारी आयव्यायको हिसाब राख्ने महालेखा नियन्त्रक कार्यालयका अनुसार चालु बजेट कार्यान्वयनको चैत मसान्तसम्म कुल १८ खर्ब ६० अर्बको बजेटमा सरकारले ९ खर्ब १८ अर्ब बजेट खर्च गरेको छ । बजेट कार्यान्वयनको अब तीन महिना मात्रै बाँकी छ । कुल बजेट पुरा खर्च गर्न अझै सरकारले यो अवधिमा ८ खर्ब ६२ अर्ब खर्चिनुपर्छ ।

चालु शीर्षकमा चालु आ।व।का लागि ११ खर्ब ४० अर्बको बजेट ल्याएकोमा ६ खर्ब ७८ अर्ब मात्रै खर्च गर्न गठबन्धन सरकार सफल भएको छ भने पुँजीगततर्फको ठूलो बजेट खर्च गर्न गठबन्धन सरकार पूरा असफल भएको छ । पुँजीगत शीर्षकमा ३ खर्ब ५२ अर्ब बजेट ल्याइएकोमा बल्लबल्ल सरकारले चैत मसान्त सम्म १ खर्ब १ अर्ब मात्रै खर्च गरेको छ ।

जनताले प्रत्यक्ष अनुभूति गर्ने विकास निर्माणका काम गर्न सरकार पूर्णरुपमा असफल बनेको सरकारी तथ्यले नै प्रष्ट पारेको छ । त्यसो त, यो बजेट खर्च गर्न नसक्ने भन्दै सरकारले अर्धवार्षिक समीक्षामार्फत अर्थमन्त्री विष्णुप्रसाद पौडेलले झन्डै २ खर्ब बजेटको आकार नै घटाएका थिए । घटेको बजेट खर्चको आकारअनुसार पनि खर्च गर्न सरकारी अधिकारीहरू चुकिरहेको तथ्यले प्रष्ट पारेको छ ।

नेपालको लगातार दोस्रो जित, चम्किए युवराज

नेपालले यु–१९ विश्वकप एसिया छनोटमा लगातार दोस्रो जित हात पारेको छ ।

ओमानलाई आज ८ विकेटको फराकिलो अन्तरमा हराएको छ। ओमानको यो लगातार दोस्रो हार हो । जितको लागि १ सय १८ रनको चुनौति नेपालले १४.३ ओभरमा २ विकेट गुमाउँदै सहज जित आफ्नो पक्षमा पार्यो ।

नेपालका ओपनरद्वय साहिल पटेल र निरज कुमार यादवले पहिलो विकेटको लागि ८५ रनको साझेदारी गर्दै उत्कृष्ट सुरुवात दिलाए । यो साझेदारीमा नेपालले आरामदायी जित निकाल्यो।

निरज अर्धशतकबाट मात्र ४ रनले चुके। ३१ बलमा ५ चौका र २ छक्का प्रहार गर्दै ४६ रनमा आउट भए। उनलाई सौम्य भविनसम्पतले आउट गरे । त्यसपछि अर्का ओपनर साहिल ४४ रनमा सौम्यकै बलमा आउट भए। कप्तान नरेन भट्ट अविजित १२ रनमा रहे ।

यसअघि माथिल्लो मुलपानी मैदानमा टस जितेर नेपालले फिल्डिङ रोज्यो । पहिले ब्याटिङ गरेको ओमानले निर्धारित ५० ओभरको खेलमा मात्र ३६ ओभरमा अल आउट हुँदै १ सय १७ रनना समेटियो ।

ओमानका तेस्रो क्रमका जित ब्रजेश शाह बाहेक अन्य कुनै पनि खेलाडी क्रिजमा टिक्न सकेनन् । उनले अर्धशतक प्रहार गरे। ७८ बल खेल्दै ६ चौकाको मद्दतले ५२ रन जोडे । सिद्धार्थ सौम्य शंकरले १६ र प्रथिस हेमा रमेशले १० रन बनाए ।

ओमानका खेलाडीहरूले निराशाजनक ब्याटिङ गरे । कुनै पनि समय ठुलो साझेदारी बन्न सकेन्। आठ खेलाडीले दोहोरो रन छुन सकेनन् । ओमानलाई निरिह बनाउन युवराज खत्रीले सानदार बलिङ गरे । ७ ओभर बलिङ गर्दै २ मेडन सहित मात्र १५ रन खर्चेर ५ विकेट लिए । सन्तोष यादवले २ विकेट लिए ।

लगातारको दोस्रो जितमा नेपालले ४ अंक बनाएको छ । नेपालले हिजो पहिलो खेलमा युएईलाई डकवर्थ–लुइसको आधारमा ५ रनले हराएको थियो । दुई खेलमा ओमान जित विहिन छ । ओमान हिजो अफगानिस्तनसँग ८ विकेटको फराकिलो अन्तरमा पराजित भएको थियो ।

अब बुधबार नेपालले हङकङसँग र अफगानिस्तानले युएईसँग खेल्नेछ ।