एम्बुलेन्सको ठक्करबाट सशस्त्रका हवल्दारको मृत्यु

धनगढी । पूर्वपश्चिम राजमार्ग अन्तर्गत कैलालीको गौरीगंगा नगरपालिका ९ शंकरपुरमा एम्बुलेन्स र मोटरसाइकल ठोक्किँदा एक जनाको मृत्यु भएको छ भने एक जना घाइते भएका छन् ।

से१च १८२८ नम्बरको एम्बुलेन्स र म२प ५३०३ नम्बरको मोटरसाइकल एकापसमा ठोक्किँदा मोटरसाइकलमा सवार सशस्त्र प्रहरी सहायक हवल्दार गोरख ऐरको मृत्यु भएको जिल्ला प्रहरी कार्यालयका प्रहरी नायव उपरीक्षक दक्षकुमार बस्नेतले बताए।

उनका अनुसार घोडाघोडी नगरपालिका वडा नम्वर १० घर भएका ३५ बर्षीय ऐर सशस्त्र प्रहरी बेस क्याम्प पहलमानपुरमा कार्यरत थिए । मोटरसाइकल चालक घोडाघोडी नगरपालिका वडा नम्वर १० का २८ बर्षीय भरत बोहरा भने घाइते भएका छन् ।

एम्बुलेन्स चालक धनगढी उपमहानगरपालिका वडा नम्वर १० का ५४ बर्षीय आशाराम चौधरीलाई ईलाका प्रहरी कार्यालय सुख्खडले नियन्त्रणमा लिएको छ ।