४ दिन बितिसक्दा पनि पत्ता लागेन रीनाको हत्यारा, आन्दोलन आज पनि जारी

बैशाख १०, काठमाडौं । रीना बस्नेतकाे हत्या भएकाे ४ दिन बितिसक्दा पनि अपराधी पत्ता नलागेपछि पथरी बजार अहिले अशान्त बन्दै गइरहेको छ । 

निरन्तर श्रृङ्खलाबद्ध घटना हुँदा पनि स्थानिय प्रशासनले चासो नदिएपछि स्थानिय आन्दोलित बनेका हुन् । हिजो करिब ३ घण्टा सडक अवरुद्ध पारी सुरु गरिएको विरोध कार्यक्रम स्थानियले आज पनि जारी राखेका छन्। 

null

स्थानिय व्यापारी कविता पराजुलीको संयोजकत्वमा बनेको संघर्ष समितिले अहिले नगरपालिका कार्यलय, उद्योग वाणिज्य संघको कार्यालय र १ नम्बर वडा कार्यालयमा तालाबन्दी गरेको छ । 

नगरपालिकाको कार्यालयमा लगाएको ताला प्रहरीले फुटाएपछि केहीबेर अशान्त समेत बनेको छ । आफ्ना कार्यक्रमको समर्थन नगरेको आरोप लगाउँदै अहिले स्थानिय जनता नगरप्रमुख र उप–प्रमुखसँग रुष्ट बनेका छन् । जिल्ला प्रहरी कार्यालय मोरङले भने घटनामा जाेडिएका शंकास्पद एक व्यक्तिलाई नियन्त्रणमा लिएर हत्याको अनुसन्धान जारी राखेको जनाएको छ ।  

गत शनिबार २९ वर्षीया रीना बस्नेत आफ्नै कोठा अगाडी निर्वस्त्र अवस्थामा सडकमा मृत फेला परेकी थिइन् । बस्नेतको शव पोष्टमार्टमका लागि धरानस्थित वीपी स्वास्थ्य विज्ञान प्रतिष्ठानमा लगिएकाे छ । पोष्टमार्टमकाे रिपाेर्ट आउन बाँकी रहेकेा प्रहरीले जनाएकाे छ। बस्नेतका श्रीमान् रोजगारीका क्रममा विदेशमा रहेका छन्।मृतक रीना १४ वर्षीय छोरासँगै डेरामा बस्थिन्। उनले कस्मेटिक पसल सञ्चालन गरेकी थिइन्।  

इलाका प्रहरी कार्यालयको कार्यक्षेत्र भित्रै ४ महिना नपुग्दै ६ वटा शंकास्पद मृत्यु प्रकरण भएपनि प्रहरीले कुनै पनि घटनामा संलग्नलाई पत्ता लगाउन सकेको छैन ।