अब ठूलो संख्यामा लोक सेवाको विज्ञापन खोलिन्छः मन्त्री पण्डित

बैशाख २०, काठमाडौं । संघीय मामिला तथा सामान्य प्रशासनमन्त्री लालबाबु पण्डितले आगामी एक हप्ताभित्रै कर्मचारी समायोजनको सम्पूर्ण काम सम्पन्न गरिसक्ने विश्वास दिलाएका छन् । 

शुक्रबार रिपोर्टर्स क्लब नेपालले आयोजना गरेको साक्षात्कारमा बोल्दै मन्त्री पण्डितले प्रशासनिक तर्फको कर्मचारी समायोजनको धेरैजसो काम सम्पन्न भइसकेको बताए । उनले भने, ‘अहिले स्वास्थ्यतर्फको काम धमाधम भइरहेको छ । एक हप्ताभित्रै सबै समायोजनको काम सम्पन्न गरिसक्छौं । बढिमा यो महिनाभित्रै काम सकिन्छ भन्नेमा म विश्वस्त छु ।’ 

null

मन्त्री पण्डितले मुलुक यतिबेला संघीयता कार्यान्वयनको चरणमा रहेकोले सरकार त्यसतर्फ सचेत भएर अघि बढिरहेको सुनाए । उनले भने, ‘एकात्मक शासन व्यवस्थाबाट संघीयतामा जाने मुलुकहरुमध्ये नेपाल अरुभन्दा तिव्र गतिमा काम अघि बढाउनेमा पर्दछ ।’ 

संघीयता कार्यान्वयनका कामहरु अघि बढाउँदा केही अप्ठ्याराहरु आएपनि वर्तमान सरकारले बढो जिम्मेवार ढंगले कामहरु सम्पन्न गरिरहेको पनि मन्त्री पण्डितको भनाई छ । उनले भने, ‘हामीले संघ, प्रदेश र स्थानीय तहमा कर्मचारी व्यवस्थापनदेखि लिएर प्रशासनिक संरचनाहरु तयार गरिसक्यौं । कर्मचारी समायोजनमा केही समस्या देखिए पनि त्यो पनि हामीले कुशलतापूर्वक सम्पन्न गर्दैछौं ।’ 

समायोजनको विषयमा कर्मचारीहरुले उठाएका र राखेका जायज गुनासाहरुलाई सरकारले सम्बोधन गरेको पनि उनले सुनाए । उनले भने, ‘हामीले कर्मचारीका जायज गुनासाहरु सम्बोधन गरेका छौं । कतिपयको अझै सम्बोधन गर्नुपर्नेछ । त्यसतर्फ हामी गम्भिर छौं ।’ समायोजनको हकमा महिला तथा गम्भिर बिरामी लागेका कर्मचारीहरुलाई पहिलो प्राथमिकता दिइएको उनले स्पष्ट पारे । 

त्यस्तै, फरक क्षमता भएका लगायतका अन्य कर्मचारीहरुको पनि आफूहरुले उचित व्यवस्थापन गर्ने मन्त्री पण्डितले विश्वास दिलाए । प्रदेश लोकसेवा आयोग गठन नहुन्जेलसम्म केन्द्रले कर्मचारी भर्नाको आवश्यकता गर्ने भएकोले आउने हप्ताभित्र स्थानीय र प्रदेश तहको लागि कमर्चारी आवश्यकताको लागि विज्ञापन गरिने मन्त्री पण्डितले स्पष्ट पारे । उनले भने, ‘अब ठूलो संख्यामा लोकसेवाको विज्ञापन खोलिनेछ ।’ 

स्थानीय तहको सवालमा पनि यो वर्षको असार मसान्तभित्रै कर्मचारीको सबै व्यवस्थापन भइसक्ने उनले दाबी गरे । उनले भने, ‘आउने आर्थिक वर्षदेखि अब कर्मचारीको अभाव हुनेछैन । अब सेवाग्रहीले गुनासो पोख्न पाउनुहुनेछ।’