साम्रज्ञीको ‘रातो टीका निधारमा’ को ट्रेलर सार्वजनिक

भाद्र १८, काठमाडौँ । नायिका साम्राज्ञी राज्य लक्ष्मी शाह र नव नायक अंकित शर्माद्वारा अभिनित चलचित्र ‘रातो टीका निधारमा’को ट्रेलर युटुब मार्फत सार्वजनिक गरिएको छ । 

दशैँको मुखैमा प्रर्दशन मिति तोकिएको यस चलचित्रमा साम्राज्ञी र अंकितसँगै नीता ढुंगाना, रविन्द्र झा, बुद्धि तामाङ, खुश्बु खड्का, राजाराम पौडेल, शिवहरी पौडेल, लक्ष्मी गिरी, बसुन्धारा भुषाल लगायतका कलाकारको भूमिका रहेको छ ।   

करिब ३ मिनेटको सार्वजनिक ट्रेलरमा नायिका साम्राज्ञीलाई एउटा गाउँले केटीको भूमिका प्रस्तुत गरिएको छ भने नव नायक अंकितलाई वैदेशिक रोजगारमा मान्छे पठाउने एजेन्टको रुपमा देखाईएको छ ।   

अशोक शर्माद्वारा निर्देशित पुरानो चलचित्र ‘अल्लारे’ को  ‘रातो टीका निधारमा’ बोल रहेको  गितलाई नै शिर्षक राखिएको यस चलचित्रमा अशोक कै  निर्देशन तथा निर्माण  रहेको छ । यस चलचित्रका नव नायक अंकित  निर्देशक तथा निर्माता अशोकको नै छोरा हुन् । उनले यही चलचित्रबाट छोरा अंकितलाई चलचित्रमा डेब्यु गराएका हुन् ।   

असोजको १० गते प्रदर्शन मिति तोकिएको यस चलचित्रको ट्रेलर हेरेपछी धेरैको नजर अंकित शर्मामाथि परेको छ । चलचित्रको पहिलो रोमान्टिक गीत सार्वजनिक भएसँगै अंकितलाई लिएर विभिन्न खालका टिकाटिप्पणी भएको थियो । 

उनले अभिनय गर्न नजानेको, रोमान्टिक भूमिकामा नखुलेको लगायतका टिप्पणी भएको थियो ।  तर, यसको ट्रेलर  हेरेपछि भने चलचित्रकर्मी र पत्रकारले उनको प्रशंसा गरेका छन् ।  गीत हेर्दा अंकितप्रति निराश भएका चलचित्रकर्मी र पत्रकार ट्रेलर हेरेपछि आशावादी देखिएका छन् ।