अर्जेन्टिनालार्इ झट्का, भेनेजुएलासँगको खेल बराबरीमा रोकियो

“

एजेन्सी । अागामी वर्ष रुसमा हुने विश्वकप फुटबलको छनौट अन्तर्गत बुधवार बिहान भएको खेलमा अर्जेन्टिना बराबरीमा रोकिएको छ । दक्षिण अमेरिकी क्षेत्रको छनौट अन्तर्गतको खेलमा लियोनल मेस्सीको टिम अर्जेन्टिना भेनेजुएलासँग १–१ को बराबरीमा रोकिएको हो । पहिलो हाफमा गोलरहित बराबरी भएको खेलमा ५१ औँ मिनेटमा जोन मुरिल्लोको गोलबाट भ्रमण टोली भेनेजुएलाले अग्रता लिएको थियो ।

तर, त्यसको तीन मिनेटपछि अर्जेन्टिनाका लागि उपहार गोल प्राप्त भयो । भेनेजुएलाका रोल्फ फ्लेट्स्चारले आत्मघाती गोल गरेपछि खेल १–१ को बराबरीमा पुगेको थियो । खेल बराबरीमा रोकिएपछि अर्जेन्टिनाले रुस विश्वकपमा स्थान बनाउनका लागि आउँदो महिना हुने छनौट चरणका खेलमा मेहनत गर्नुपर्ने भएको छ । बराबरीपछि अर्जेन्टिना १६ खेलबाट २४ अङ्कसहित पाँचौँ स्थानमा छ । १० देश रहेको समूहमा शीर्ष चारमा रहने टिम विश्वकपका लागि छनौट हुने छ भने पाँचौँ स्थानमा रहने टिमले प्लेअफ खेल्नुपर्ने छ ।

“