भालुको पित्त र जडिबुटीसहित कैलालीमा एक पक्राउ

बिष्णु जोशी

धनगढी, माघ १४ ।  भालुको पित्त र जडिबुटीसहित कैलालीमा एक जना पक्राउ परेका छन् । जुम्ला सुनीगाउँ –८ बस्ने ६५ वर्षिय सुनम धिताललाई प्रहरीले आइतबार पक्राउ गरेको हो । क्षेत्रीय अनुसन्धान समूह (आरआईटी) सुप र सेती अञ्चल अनुसन्धान समूहको संयुक्त टोलीले धनगढी उपमहानगरपालिका–२ बाट उनलाई पक्राउ गरेको जनाइएको छ ।

टोलीले उनीबाट ७० ग्राम भालुको पित्त र रक्तचन्दन, पदमचाल, कुटुकी, सतुवा, हिङ, निलबिसी र शिलाजित लगायतका जडिबुटी बरामद गरेको छ । उक्त अबैध जडिबुटीहरु कुन ठाउँबाट आयात गरेको हो भन्ने बारेमा थप अनुसन्धान भइरहेको क्षेत्रीय प्रहरी प्रमुख माधव नेपालले जानकारी दिए ।