धनगढीका चोक–चोकमा दाउरा बितरण

धनगढी, पुस २३ । धनगढी उपमहानगरपालिकाले बजार क्षेत्रका विभिन्न स्थानमा दाउरा वितरण गरेको छ । केही दिन यता बढ्दै गएको चिसोलाई मध्यनजर गर्दै त्यसबाट प्रभावितको राहात स्वरुप बजारका चोकचोकमा दाउरा वितरण गरिएको उपमहानगरपालिकाले जनाएको छ ।

सितलहर संगै चल्ने चिसो हावाका कारण केहि दिन यता जनजिवन प्रभावित बन्दै गएपछि दाउरा वितरण गरिएको नगर प्रमुख नृप बहादुर वडले बताए । आज बजारका मुख्य मुख्य चोकमा दाउरा वितरण गरिएपनि भोलि देखि भित्री बस्ती तथा चोकहरुमा समेत दाउरा वितरण गरिने जानकारी दिए ।

वितरणका लागि आवश्यक पर्ने दाउराको व्यवस्थापनका लागि जिल्ला वन कार्यालयसँग कुराकानी भइसकेकाले नगरपालिकाको टिपर मार्फत दाउरा संकलन गरी वितरण गर्ने योजनामा रहेको नगर प्रमुख वडले बताए ।

चिसो बढ्दै गएपछि यस क्षेत्रको जनजीवन कष्टकर बन्दै गएको छ । चिसोबाट बालबालिका र बृद्धबृद्धा बढि प्रभावित भएका छन् ।