नायिका आलियालाई लाग्याे चोरीको आरोप

भाद्र ११, भारत ।  बलिउड अभिनेत्री आलिया भट्टलाई चोरीको आरोप लागेको छ । केहि दिन अगाडी आलियाको ‘प्राडा’ बोलको गीत सार्वजनिक भएको थियो । यो गीत मार्फत आलियाले म्युजिक भिडिओमा डेब्यु गरेकी छिन् । यो गीतलाई दर्शकले निकै मन पराएका थिए तर पाकिस्तानी अभिनेत्री मेहविश हयातले आलियाले प्राडा गीत चोरेको आरोप लगाएकी छिन् । 

मेहविशले ‘वाइटल साइन’ एल्बम्को ‘गोरे रंगका जमाना’ बोलको पाकिस्तानी गीतसँग आलियाको प्राडा गीत मिलेको बताएकी छिन् । उनले टुविट मार्फत आलियालाई गीत चोरीको आरोप लगाएकी हुन् । उनले लेखेकी छिन्, ‘यो निकै अजिब कुरा हो । बलिउडको हरेक कार्यक्रममा पाकिस्तानलाई गाली दिने गरिन्छ, तिरस्कार गरिन्छ । तर पनि पाकिस्तानको हरेक गीत चोरिन्छ । उनीहरुलाई कपीराइट उल्लंघन र रोयल्टीबारे केहि मतलब छैन ।’ 

मेहविशले केहि समय अगाडी एक अवार्ड शोमा बलिउड र हलिउडको निकै आलोचना गरेकी थिइन् । उनले बलिउड र हलिउड फिल्मले पाकिस्तानको नराम्रो छवि प्रस्तुत गरेको आरोप लगाएकी थिइन् । एजेन्सी