कञ्चनपुरको क्षेत्र नं १ मा पुरानै प्रतिद्वन्द्वीबीच प्रतिस्पर्धा

“

मङ्सिर १५, कञ्चनपुर । प्रतिनिधिसभा तथा प्रदेशसभा सदस्यको निर्वाचनमा कञ्चनपुरको निर्वाचन क्षेत्र नं १ मा पुरानै चिरपरिचित प्रतिद्वन्द्वीबीच रोचक प्रतिस्पर्धा हुने भएकाे छ ।

संविधानसभाको निर्वाचनमा अहिलेका नेपाली काँग्रेसका दिवान सिंह विष्ट र वाम गठबन्धनका बिना मगर प्रतिस्पर्धीमा छन् । अहिले प्रतिनिधिसभाको निर्वाचनमा पनि दुवै जना प्रतिस्पर्धी हुन ।

एमाले र माओवादी केन्द्र दुवै पार्टीले साझा उम्मेदवारका रूपमा मगरलाई मैदानमा उतारेको छ भने काँग्रेसका विष्ट एक्लै चुनावी मैदानमा छन् । दुवै जनाले जिल्लाको दक्षिणी क्षेत्रको विकासका लागि चुनावी एजेण्डासहित प्रचार प्रसारलाई अगाडि बढाएका छन् ।

स्थानीय तहको निर्वाचनको वडाध्यक्षका उम्मेदवारले पाएको मतका आधारमा एमालेको १८ हजार ५६९ र माओवादी केन्द्रको १६ हजार ११५ मत गरी वाम गठबन्धनको ३४ हजार ६०४ मत छ भने काँग्रेसको १४ हजार ९५६ मत छ । चार स्थानीय तह रहेको १ नं निर्वाचन क्षेत्रमा सबै स्थानीय तहमा वाम गठबन्धनको पार्टीका नेताले नै प्रमुख उपप्रमुख र अध्यक्ष उपाध्यक्ष पद जितेका थिए ।

उक्तं निर्वाचन क्षेत्रमा आठ हजार ५९ मतदातामध्ये महिला ४५ हजार १०७ र पुरुष ४२ हजार ९५२ छन् । वाम गठबन्धनका उम्मेदवारले सीमा समस्या समाधान, सडकको स्तरोन्नति, सिमसार समस्या समाधान, जंगली जनावरको आतङ्क नियन्त्रण, दोदा र चौधर नदीको कटान नियन्त्रण, आरक्ष विस्थापित समस्याको स्थायी समाधान, शिक्षा, स्वास्थ्य, पर्यटकीय क्षेत्रको विकास, राना थारू संस्कृतिको संरक्षण र प्रचारप्रसार लगायतका विषयलाई चुनावी मुद्दा बनाएका छन् ।

पुनर्वास सीमा क्षेत्रमा भारतीय सुरक्षाकर्मीको गोली लागेर स्थानीयवासी गोविन्द गौतमको हत्या भयो । लगत्तै सरकारी स्तरबाट आएको अनुगमन टोलीलाई काँग्रेसको नेतृत्वमा सरकार बन्ने बित्तिकै फिर्ता बोलाइयो, प्रतिनिधिसभा सदस्य उम्मेदवार मगरले भन्नुभयो, “अनुगमन टोलीले काम गर्न नपाउँदा समस्या ज्यूँ का त्यूँ छ । हामी वाम गठबन्धनको सरकार बनाएर सीमा समस्याको स्थायी समाधान खोज्न चाहन्छौँ ।”

शेरबहादुर देउवा नेतृत्वकै सरकारले तत्कालीन आरक्ष क्षेत्र विस्तारका क्रममा २०५८ सालमा विस्थापित गरिएका परिवारको हालसम्म पनि पुनः स्थापना नभएको विषयसमेत वाम गठबन्धन र नेपाली काँग्रेसका उम्मेदवारको चुनावी मुद्दा बनेको छ ।

कञ्चनपुरकै दुर्गम गाउँपालिका लालझाडीलाई राना पर्यटकीय गाउँका रूपमा विकास गर्न सकिने योजनासहित चुनावी प्रचारप्रसार भइरहेको नेकपा एमालेका जिल्ला अध्यक्ष तथा १ नं क्षेत्रको प्रदेशसभा १ का उम्मेदवार तारा लामा तामाङले बताए ।

काँग्रेसका उम्मेदवार विष्टले जिल्लाको पुरानो सदरमुकाम बेलौरी बजारलाई नमुना सहरका रूपमा विकसित गर्ने चुनावी एजेन्डा अगाडि सारेका छन् । छोटी भन्सारलाई भन्सार कार्यालयका रूपमा स्थापना गरी व्यापारिक केन्द्रका रूपमा बेलौरीलाई चिनाउने प्रतिबद्धता उनले गरे ।

प्रदेशसभाका उम्मेदवार गोपाल गुरुङले राना थारू जनजातिको ऐतिहासिक पृष्ठभूमि जोगाउनका लागि सङ्ग्रहालय स्थापना गर्ने, एलानी जग्गाको लालपुर्जा उपलब्ध गराउने, दुर्गम बस्तीमा कालोपत्र सडक बनाउने, जंगली हात्ती नियन्त्रणका लागि प्रभावकारी योजना ल्याउने, बाढीबाट विस्थापनमा परेका परिवारको पुनः स्थापना गर्ने चुनावी एजेण्डासहित मैदानमा उत्रिएको बताए ।

“