अखिल क्रान्तिकारीको २१औं राष्ट्रिय सम्मेलनमा निर्वाचनको तयारी

काठमाडौं, भदौ १३ । माओवादी केन्द्रनिकट विद्यार्थीसंगठन अखिल क्रान्तिकारीको २१ औं राष्ट्रिय सम्मेलनबाट निर्वाचनमार्फत नयाँ नेतृत्व चयन प्रक्रिया सुरु भएको छ । १० वर्षे सशस्त्र संघर्षसँगै २०६३ सालमा शान्तिप्रक्रियामा प्रवेश गरेको नेकपा माओवादी केन्द्र र उसका भ्रातृ संगठनको इतिहासमा पहिलोपटक नेतृत्व चयनका लागि निर्वाचन हुन लागेको छ ।

माओवादी केन्द्रले यसअघि पार्टी, पार्टीको सहायक संगठन र भ्रातृ संगठनहरूको नेतृत्व चयन सहमतिको नाममा मनोनित गर्दै आएको थियो । माओवादी केन्द्रका एक सहायक संगठन (वाईसीएल), प्रमुख र सहायक गरी २१ भ्रातृ संगठन छन् । ती सबैमा हालसम्म सहमतिमै नेतृत्व चयन हुँदै आएका छन् । क्रान्तिकारीको यो २१औं एकता महाधिवेशन हो । ७ भदौदेखि जारी राष्ट्रिय सम्मेलनअन्तर्गत नेतृत्व चयनका लागि आज निर्वाचन हुनेछ ।

निर्वाचन समिति संयोजक रमेश मल्लले प्राविधिक विषय मिलाउनुपर्ने भएकाले निर्वाचन सुरु हुन समय लाग्ने बताउनुभयो । अखिल क्रान्तिकारीको नयाँ नेतृत्वका लागि तीन जनाले उम्मेदवारी दर्ता गरेका छन् । जसमा रञ्जित तामाङ, अनिल शर्मा र मदन अर्याल हुनुहुन्छ ।