प्राज्ञ अशोक राईको सांस्कृतिक संयोजनमा प्रदेश एक्स्पो

फागुन २०, दाङ । प्रदेश नम्बर-५, दाङको बेलझुन्डीमा प्रदेश एक्स्पो सम्पन्न भएको छ । प्रदेशमा लगानी ल्याउने उद्देश्यले प्रदेश-५ सरकारद्वारा आयोजना गरिएको एक्स्पो-२०७६ को मुख्यमन्त्री शंकर पोख्रेलले उद्घाटन गरेका थिए ।  

एक्स्पो उद्घाटन समारोहलाई सम्बोधन गर्दै मुख्यमन्त्री पोखरेलले प्रदेश-५ लाई नमुना प्रदेशको रूपमा अघि बढाउने योजना रहेको बताए । उनले एक्सपोले प्रदेशभित्र रहेका सांस्कृतिक विविधतालाई नजिकबाट चिन्ने अवसर प्रदान गर्ने विश्वास व्यक्त गरेका थिए । 

उद्घाटनका अवसरमा थारु, मगर तथा गन्धर्व जातिका लोकनृत्यका साथै मौलिक धुनहरु प्रस्तुत गरिएको थियो । यसका साथै थारु जातिको सखिया, झुम्रा, लाठी नाच, सोरठी, कौरा, टप्पा नृत्य प्रस्तुत गरिएको थियो । विभिन्न २७ विद्यालयका २४० जनाले विद्यार्थीद्वारा सामूहिक प्रस्तुत गरिएको थियो भने १६० जनाले मौलिक भेषभुषामा थाली नृत्य प्रस्तुत गरेका थिए । 

१२ वटा जिल्लाबाट आएका गन्धर्व समूहले सारङ्गीमा मंगल धुन, भजन धुन, भ्याउरे भाका र द्यौसी भाका सुनाएका थिए । विभिन्न गायक÷गायिकाले गीत गाएर सुनाएका थिए । 

नेपाल सङ्गीत तथा नाट्य प्रज्ञा-प्रतिष्ठानको सांगीतिक तथा सांस्कृतिक सहकार्य रहेको उक्त एक्स्पो १० फागुनबाट सुरु भई तीन दिनसम्म चलेको थियो । सांगीतिक तथा सांस्कृतिक कार्यक्रमको संयोजन प्राज्ञ अशोक राईको रहेको थियो । उक्त एक्स्पोमा नवीनतम् प्रविधिको समेत प्रदर्शनी रहेको थियो ।