सुरक्षा गार्डको ड्युटीमै हत्या

काठमाडौं, माघ १५ । काठमाडौंमा ड्युटीमै रहेका एक सुरक्षागार्डको हत्या भएको छ ।

मच्छेबहालमा रहेको इस्टवेस्ट सेक्युरिटजमा सुरक्षा गार्डको रुपमा कार्यरत दोलखा मावापौवा–२ घर भएका ५३ वर्षीय तुलबहादुर तामाङको गएराति हत्या भएको हो ।

उनी ड्युटीमै रहेका बेला धारिलो हतियार प्रयोग गरी हत्या भएको प्रहरीले जनाएको छ । तामाङको टाउको र हिपमा गहिरो चोट छ । अत्यधिक रक्तश्रावका कारण उनको मृत्यु भएको प्रारम्भिक अनुमान छ ।

गएराति १ बजेतिर असन र इन्द्रचोक बीचमा पर्ने मच्छेबहालमा अचेत अवस्थामा तामाङलाई फेला पारेपछि प्रहरीले ट्रमा सेन्टर पु‍र्याएको थियो । तर अस्पतालमा पौने २ बजेतिर तामाङको मृत्यु भएको घोषणा डाक्टरहरुले गरेका थिए ।

प्रहरी कन्ट्रोल रुमका एक अधिकारीका अनुसार हत्यामा संलग्नको खोजी भइरहेको छ । सीसीटिभी फुटेजको आधारमा हत्यामा संलग्नको खोजी कार्य तीव्र पारिएको प्रहरीले जनाएको छ । तर, सोमबार बिहानसम्म प्रहरीले कसैलाई पनि पक्रन सकेको छैन ।