भोलिदेखि सबै अन्तर्राष्ट्रिय उडान बन्द गर्दै साउदी

चैत १, काठमाडौं । साउदी अरेबियाले कोरोना भाइरस संक्रमण रोकथाम तथा नियन्त्रणका लागि आइतबारदेखि सबै अन्तर्राष्ट्रिय उडान बन्द गर्ने भएको छ । 

साउदी अरबको आन्तरिक मामिला मन्त्रालयले आज (शनिबार) गरेको निर्णयअनुसार आइतबार स्थानीय समय बिहान ११ बजेदेखि आफ्नो मुलुकमा दुई हप्तासम्म कुनै अन्तर्राष्ट्रिय उडान गर्न दिइने छैन । 

विशेष परिस्थितिमा आएमा भने प्रतिबन्ध नलगाइने अन्तर्राष्ट्रिय सञ्चार माध्यमहरुले जनाएका छन् । यस अवधिका स्वदेश फर्कन नसक्नेका लागि बिदा दिने निर्णय पनि साउदी सरकारले गरेको छ ।  

यसअघि साउदी अरबले युरोपेली युनियनअन्तर्गतका सबै र एसिया र अफ्रिकाका १२ वटा देशका यात्रुलाई प्रवेशमा रोक लगाइसकेको छ। 

शनिबार बिहानसम्म साउदी अरबमा ८६ जनामा संक्रमण देखिएको छ।