पशुपतिनाथको कति छ सम्पत्ति ? कोषले सार्वजनिक गर्यो विवरण

जेठ २२, काठमाडौं । पशुपतिनाथको ढुकुटीमा वि.सं. २०१९ देखि ०७५ सम्ममा ९ किलो २ सय ७६ ग्राम सुन जम्मा भएको प्रतिवेदन सार्वजनिक भएको छ । 

पशुपति क्षेत्र विकास कोषले बुधबार पत्रकार सम्मेलन गरी पशुपतिनाथको ढुकुटीमा जम्मा भएको सम्पत्ति विवरण सार्वजनिक गरेको हो । 

null

कोषले पत्रकार सम्मेलनमा गुठी जग्गाको प्रतिवेदन पनि सार्वजनिक गरेको छ । हाल कोषसँग १८ हजार ३ सय ४२ रोपनी २ आना २ दाम जग्गा रहेको छ । 

यस्तै पशुपतिनाथको नाममा एक अर्ब २९ करोड ३८ लाख, ३१ हजार २ सय १५ रुपैयाँ ५२ पैसा विभिन्न बैंकमा नगद मौज्दात रहेको पनि कोषले जनाएको छ । सो रकममध्ये एक अर्बको अक्षय कोष निर्माण गरिएको कोषले उल्लेख गरेको छ । 

पशुपति क्षेत्र विकास कोष सञ्चालक परिषदले २०७४ कात्तिक ६ गते पशुपतिनाथको सम्पत्ति संरक्षण तथा गुठी जग्गा अध्ययन तथा छानविन समिति गठन गरेको थियो । 

उक्त समितिले समयमा प्रतिवेदन बुझाउन नसकेपछि २०७५ साउन २९ गते ६ महिना म्याद थप गरिएको थियो । 

पशुपतिनाथ भण्डार तहबिलबाट प्राप्त तायदाती मुचुल्का अनुसार वि।सं। २०१९ देखि २०६८ सम्म ८ किलो २ सय ३२ ग्राम सुन र १ सय ७५ किलो ४ सय ५८ ग्राम चाँदी मूल ढुकुटीमा दाखिला भएको देखिएको छ। त्यस्तै ०६८ देखि ०७५ सालसम्म सम्पत्ति संरक्षण महाशाखाबाट प्राप्त विवरणअनुसार १ हजार ४४।६४ ग्राम सुन र १ लाख ४१ हजार १ सय २८।७५ ग्राम चाँदी ढुकुटीमा जम्मा भएको छ। समितिले वि।सं। २०१९ भन्दा अगाडिको तायदाती मुचुल्का फेला पार्न नसकेको पनि जनाएको छ। 

त्यसैगरी कोषको अचल सम्पत्ति दर्ता प्रमाणित ३ हजार ६ सय ६७ रोपनी जग्गा रहेको समितिले जनाएको छ। त्यस्तै साबिक लगतको दर्ता प्रमाणित हुन बाँकी जग्गा क्षेत्रफल २ सय ३१ रोपनी १० आना १ दाम जग्गा रहेको छ भने त्रिभुवन विमानस्थल र ९९ वर्षको लागि सम्झौता गरी भोगचलनमा दिएको गल्फकोर्ष रहेको जग्गा १ हजार १ सय ६१ रोपनी १४ आना रहेको छ। त्यस्तै मोही तारागाउँ रिजेन्सी होटल भएको जग्गा १७ रोपनी रहेको समितिले जनाएको छ ।