३ लाख ३७ हजार नगद सहित तास खेल्ने र खेलाउने पक्राउ

भाद्र २४, विराटनगर । उर्लाबारी बजार क्षेत्रमा रहेका होटलहरुमा रातभरी खाल नै बनाएर तास खेलाउने र खेल्नेलाई मोरङ प्रहरीले पक्राउ गरेको छ ।  होटलमा तास खेलिरहेको अवस्थामा प्रहरीले सोमबार राति १० जनालाई पक्राउ गरेको हो ।   

उर्लाबारी नगरपालिका–५ मा रहेको सम्राट होटलबाट प्रहरीले एकै पटक सबै जनालाई पक्राउ गरेको इलाका प्रहरी कार्यालय उर्लाबारीका प्रहरी निरीक्षक सुभाष राईले बताए । पक्राउ पर्नेमा होटलका कर्मचारी मोहन कटुवाल, पथरीशनिश्चरेका आकाश थापा, नगेन्द्र लिम्बू, उर्लाबारीका सन्तोष राई, कृष्ण अधिकारी, दिनेश थापा, सञ्जीव गिरी, जाइतो चेम्जोङ, असोक राई र विकास राई छन् ।   

राति १२ बजे होहल्ला र झैझगडा भइरहेको सूचना आए पश्चात प्रहरी निरीक्षक राईको नेत्रृत्वमा प्रहरीहरु होटलमा छापा हान्न पुगेका थिए । छापा हान्ने क्रममा तास खेलिरहेको भेटिएपछि १० जनालाई पक्राउ गरिएको राईले बताए । 

होटलका सञ्चालकलाई भने पक्राउ नगरिएको राईले बताए । पक्राउ परेका सबै जना विरुद्ध जुवा ऐन अन्तर्गतको मुद्दा चलाउन मंगलबार म्याद थप गरेर अनुसन्धान अघि बढाइएको छ । पक्राउ परेकाहरुको साथबाट तीन लाख ३७ हजार रुपैयाँ नगद र पाँच बुक तास फेला परेको छ ।