दोश्रो संस्करण डिसेम्बर महिनामा हुने, विजेता टोलीले नगद रु २१ लाख पाउने

“

साउन १५, काठमाडौँ– एभरेष्ट प्रिमियर लिग टि-२० क्रिकेट प्रतियोगिताको दोश्रो संस्करण यहि आउँदो डिसेम्बर महिनामा हुने भएको छ । प्रतियोगिताको आयोजक इपिएल प्रा.लि. ले आज राजधानीमा एक कार्यक्रमबीच प्रतियोगिताको लोगो पनि अनावरण गरेको हो । गत सिजन ६ फ्र्यान्चाइज सम्मिलित लिगमा यस पटक भने ६ ओटा सहरको नाम प्रयोग गरिने भएको छ। उक्त टोलीहरुको मालिकको नाम भने अझै टुङ्गो नलागेको र छिट्टै त्यसको विस्तृत विवरण सार्वजनिक हुने प्रतियोगिताका संस्थापक आमिर अख्तरले जानकारी दिए । यसपटक प्रतियोगितामा काठमाडौँ, ललितपुर, पोखरा, भैरहवा, बिरगंज र बिराटनगरले सहभागिता जनाउने छन् ।

प्रत्यक टोलीमा १५ खेलाडी रहनेछन् भने टोलीको समीकरणको लागि पनि छुट्टै नियम बनाइएको छ । टोलीमा रहने १० खेलाडी अक्सनबाट छानिनेछन् भने १ खेलाडी स्थानीय स्तरमा छनोट प्रतियोगिता मार्फत राखिनेछ । त्यस्तै, प्रत्यक टोलीमा १ जना मार्की खेलाडी रहनेछन् भने ३ जना विदेशी खेलाडी अनिवार्य रुपमा राख्नुपर्ने प्रावधान रहेको छ । प्रतियोगिताको विजेता टोलीले नगद रु २१ लाख पाउनेछ । अन्य पुरस्कारको घोषणा भने पछि मात्र गरिने जानकारी दिईयो ।

प्रतियोगिताको व्यवस्थापन र दर्शक दिर्घामा विशेष स्टलहरु राख्नका लागि भारतको प्रतिष्ठित क्रिकेट लिग आइपिएल (इन्डियन प्रिमियर लिग) मा अनुभव बटुलेका व्यक्तित्वहरुको पनि सहभागिता रहने जानकारी दिइयो । यस पटक मैदानभित्र मात्र नभएर मैदान बाहिर पनि अन्तर्राष्ट्रिय स्तरको व्यवस्थापन गरिने संस्थापक अख्तरले जानकारी दिए ।

उनले नेपाली क्रिकेटमा इतिहास लेख्दै आएको इपिएलले अर्को खुड्किलो टेक्न लागेको बताए । ‘इपिएलको पछिल्लो संस्करण भव्यरुपमा सम्पन्न भएको थियो र यसपटक हामी अझ भव्य रुपमा आयोजना गर्ने लक्ष्यसहित उपस्थित भएका छौँ । अन्तर्राष्ट्रिय स्तरको प्रतियोगिता गर्ने सुरमा हामीले विदेशी खेलाडी अनिवार्य गरेका छौँ र व्यवस्थापनमा पनि विशेष जोड दिएका छौँ ।’

कार्यक्रममा राष्ट्रिय टोलीका कप्तान पारस खड्काले यस प्रतियोगितालाई लिएर आफुसँगै सम्पूर्ण क्रिकेट परिवार निकै उत्साहित रहेको बताए । ‘हामी निकै उत्साहित छौँ । पछिल्लो संस्करणमा नै इपिएलले विशेष प्रतियोगिता आयोजना गरेको थियो । यसपटक झनै भव्यरुपमा आयोजना हुन लागेको सुन्दा निकै खुशी छु । इपिएलले नेपाली क्रिकेटमा नयाँ आयाम ल्याएको थियो र सँगसँगै डीपिएलले यसलाई बढावा दिएको छ । देशमा क्रिकेटको संघ निलम्बनमा परेको अवस्थामा यस्तो प्रतियोगिता हुँदा निकै सहयोग विकासमा पुगेको छ । आशा गरौँ यस प्रतियोगिता सुरु हुँदासम्म नेपालमा क्रिकेट संघ स्थापित भइसक्नेछ ।’ उनले सिप्यान (क्रिकेट खेलाडी संघ, नेपाल) ले प्रतियोगिताको आयोजकसँग विविध विषयमा सहकार्य गरिरहेको बताए ।

प्रतियोगिताको अक्सनमा खेलाडीहरुलाई ३ समूहमा विभाजन गरिने र १० खेलाडी प्रत्येक टोलीमा अक्सन मार्फत छनोट गरिने बताइएको छ । यसका लागि नेपाली खेलाडीहरुलाई तिन वर्गमा विभाजन गरिएको छ । प्रत्येक टोलीमा ‘क’ वर्गका ३, ‘ख’ वर्गका ‘४’ र ‘ग’ वर्गका ३ खेलाडी अनिवार्य रुपमा समावेश गरिनुपर्ने प्रावधान रहेको छ ।

“