जुवा खालबाट ७ भारतीयसहित ९ जना समातिए

कात्तिक २६, धरान । सुनसरीको धरानमा जुवाको खालबाट सात भारतीय नागरिक सहित ९ जनालाई प्रहरीले पक्राउ गरेको छ । 

धरान–९ आचार्यलाइनमा तास खेल्दै गरेको अवस्थामा ७ भारतीय र २ नेपाली सहित ९ जनालाई धरान प्रहरीले पक्राउ गरेको हो । 

उनीहरूको साथबाट ६ बुङ तासका साथै ५७ हजार २ सय ७० नेपाली रुपैयाँ र ६ हजार २ सय भारतीय रुपैयाँ समेत बरामद गरिएको इलाका प्रहरी कार्यालय धरानका डिएसपी सुमनकुमार तिम्सिनाले जानकारी दिए । 

null

तिम्सिनाका अनुसार प्रवेशद्वारको ढोका लगाएर भारतीय नागरिक देवचन्द्र चौधरीको भाडामा लिएको कोठामा तास खेल्दै गरेको बेला उनीहरू पक्राउ परेका हुन् । 

पक्राउ पर्ने भारतीय नागरिकमा राजेश राम, दीपक चौधरी, पिंकु चौधरी, समील अली, पवनकुमार चौधरी र सुमित चौधरी छन् । त्यस्तै धरान–९ का गणेशकुमार कलवार र शेखर चौधरी पनि समातिएका छन् । 

उनीहरूलाई भदौ १ गतेदेखि लागू भएको अपराध संहिता अन्तर्गत जुवा ऐनमा कारबाही हुने उनले जानकारी दिए ।