काभ्रे: लुटेरा समूहले ९० लाखको बोधिचित्त लुट्यो

काठमाडौं । काभ्रेपलाञ्चोकको रोशीमा हतियारसहित आएको लुटेरा समूहले ९० लाख रुपैयाँ बराबरको बोधिचित्तको दाना लुटेको छ । उक्त समूहले रोशी गाउँपालिका-५ मा ९० लाख रुपैयाँ बराबरको बोधिचित्तको दाना लुटेको हो ।

अत्याधुनिक हतियारसहित आएको ३० जनाको समूहले वीरबहादुर तामाङको बारीमा रहेको रुखको बोधिचित्त लुटेको हो । वीरबहादुरले स्थानीय व्यापारीलाई ९० लाख रुपैयाँमा उक्त दाना बिक्री गरेका थिए ।

काभ्रेका डिएसपी कुमारविक्रम थापाका अनुसार सुरक्षाका लागि कुरेर बसेका ५ जनालाई लुटेरा समूहले आक्रमण गरी घाइते बनाएका छन् । बिहीबार राति साढे १० बजे एसएमजी बन्दुक २ थान, पेस्तोल २ थान, कटुवा बन्दुक १० थान, खुकुरी र सकेट बमसहित आएका उनीहरुले बाटोमा खतरा लेखेर यातायातका साधन चल्न दिएका थिएनन् ।

घाइतेहरुको धुलिखेल अस्पतालमा उपचार भइरहेको छ । घटनाबारे प्रहरीले अनुसन्धान थालिसकेको छ भने लुटेराको खोजी कार्य भइरहेको छ ।