देशवासीलाई मोदीको सुझावः कोरोनाको खोप नबन्दासम्म मास्क लगाऔँ
मकालु खबर
नयाँदिल्ली । भारतका प्रधानमन्त्री नरेन्द्र मोदीले कोरोनाभाइरस विरुद्धको खोप नबन्दासम्म सामाजिक दुरी कायम गर्ने र मास्क लगाउने नियमलाई कडाईका साथ कार्यान्वयन गर्नुपर्ने बताएका छन् । कोरोना भाइरसको सङ्क्रमणबाट बच्नका लागि हरेक व्यक्तिले ‘दुई गजको दुरी’ भन्ने नियमलाई ध्यान दिनुपर्ने उनकाे भनाइ छ ।
कोरोनाका कारण विश्वभरी नै धेरै पक्षमा संकट ल्याएको बताउदै उनले यसलाई अवसरको रुपमा उपयोग गर्नुपर्नेमा उनले जोड दिए । प्रधानमन्त्री मोदीले सामाजिक रुपमा पनि यसले धेरै उथलपुथल पारेपनि सतर्कता अपनाउदै अगाडी बढ्नुपर्ने धारणा राखे ।‘हामी सबै अहिले तलमाथी भएका छौँ, हाम्रो सामाजिक जीवनमा धेरै समस्या आएको छ, तर पनि हामी अब अगाडी बढ्नुपर्छ,’ उनले एक कार्यक्रममा भने ।
यो समयमा यस समस्याबाट प्रभावित नभएको संसारमै कोही नभएको बताउँदै उनले यसको समाधानका उपायहरुको खोजी भइरहेको जानकारी दिए । यो रोगबाट कहिले मुक्ति पाइन्छ भन्ने थाहा नभएकाले यसको विरुद्धको खोप पत्ता नलाग्दासम्म सामाजिक दुरी कायम राख्ने, मास्क लगाउने लगायतका आधारभूत सतर्कताहरु अप्नाउनुको विकल्प नभएको उनले बताए । (रासस/एएनआई)
मकालु खबर
