आज ६ उडान मार्फत विभिन्न देशबाट नेपाली आउँदै

काठमाडौं । आज खाडीका देश सहित अन्य तीन देशमा रहेका नेपालीहरु स्वदेश आउने भएका छन् । आज ६ उडानमार्फत विभिन्न देशबाट नेपालीहरु स्वदेश फर्कने भएका छन् । खाडीका देश, मलेसिया र माल्दिभ्समा समस्यामा परेका नेपाली स्वदेश आउने उडान तालिका रहेको त्रिभुवन विमानस्थलले जनाएको छ ।

विमानस्थलका अनुसार आज कुवेतबाट दुई उडानमार्फत नेपालीहरु स्वदेश आउँदैछन् । नेपाल एअरलाइन्सको चार्टर्ड उडानमार्फत त्यहाँ समस्यामा रहेका नेपाली आउँदैछन् भने जजिरा एअरले त्यहाँ आममाफीमा सहभागी नेपालीलाई नेपाल लिएर आउँदैछ ।

यस्तै आज साउदीबाट पनि दुई उडानमार्फत नेपाली फर्कने भएका छन् । साउदीको दमामबाट हिमालय एअरलाइन्स र जेद्दाबाट नेपाल एअरलाइन्सको चार्टर्ड उडानमार्फत नेपालीहरु स्वदेश फर्कनेछन् ।

मलेसियाको क्लालाम्पुरबाट मालिण्डो एअरले नेपाली लिएर आउँदैछ भने हिमालय एअरमार्फत आज माल्दिभ्सबाट पनि नेपाली फर्कने तालिका रहेको छ । आजै हिमालय एअरलाइन्स नेपाली लिन यूएईको आबुधाबी जाँदैछ । हिजो हिमालय एअरलाइन्सले उडान गन्तव्यको तालिका सार्वजनिक गरेको थियो ।