संखुवासभा पहिरो-उद्धार टोली पुग्न अझै केही समय लाग्छ : प्रजिअ आचार्य

काठमाडौं । अविरल परेको वर्षाका कारण संखुवासभाको सिलिचोङ गाउँपालिकामा आएको बाढीमा परी प्रभावित भएका पीडितहरुको उद्धारको लागि उद्धार टोली घटनास्थलसम्म पुग्न अझै केही समय लाग्ने संखुवासभाका प्रमुख जिल्ला अधिकारी जीवन प्रसाद आचार्यले बताएका छन् ।

मकालु खबरलाई घटनाको पछिल्लो अवस्थाबारे जानकारी दिँदै अधिकारी आचार्यले घटनास्थल टाढा भएको र त्यहाँसम्म उद्धार टोली पुग्न अझै केही समय लाग्ने बताए ।

“घटनास्थलतिर हामीले उद्धार टोली ‘मूभ’ गराइसकेका छौं । घटनास्थल टाढा हो, अझै उहाँहरुलाई त्यहाँ पुग्न केही समय लाग्छ ।” प्रजिअ आचार्यले हामीलाई भनेका छन्, ‘उद्धार टोली पुग्न अझै केही समय लागे पनि, अहिले त्यहाँका जनप्रतिनिधिले केही कदम चाल्नुभएको छ ।’

यस्तै उनले आफूहरुले नेपाली सेना, नेपाल प्रहरी तथा सशस्त्र प्रहरीसम्मलाई घटनास्थलतर्फ ‘मूभ’ गरेको बताए । त्यहाँ आएको बाढीका कारण आठ घर पुरिएको तथा ११ जना बेपत्ता भएको समाचार छ ।