नेता सिंहको टिप्पणी, ‘देउवा फेल भइसके’

काठमाडौं । नेपाली कांग्रेसका नेता प्रकाशमान सिंहले पार्टी सभापति शेरबहादुर देउवा फेल भइसकेको टिप्पणी गरेका छन् ।

संवाददाताहरुसँगको कुराकानीको क्रममा नेता सिंहले तेह्रौं महाधिवेशनबाट पार्टीको नेतृत्व सम्हालेका नेताले नै विधानले तोकेको काम, कर्तव्य र अधिकारअनुरुप काम नगर्दा पार्टीको स्वास्थ्य बिग्रेको टिप्पणी गरेका हुन् ।

पार्टीको विधान र नियमावलीले निर्देशित गरेअनुरुप काम नगर्दा पार्टी अप्ठेरो अवस्थामा पुगेको उनले तर्क गरेका छन् ।

“१३औं महाधिवेशनबाट जुन नेतृत्व निर्वाचित हनुभयो, निर्वाचित पदाधिकारीले निर्वाचित भइसकेपछि आउने जिम्मेवारी र नेपाली कांग्रेसको विधान र नियमावलीले निर्देशित गरेको काम, कर्तव्य र अधिकार विशेष गरेर पार्टी सभापतिले विधानले गाइड गरेअनुसार गर्नुपर्ने काम कर्तव्य र अधिकारमा उहाँ चुकेको देखिएको छ । पार्टी सभापति जिम्मा लिएको व्यक्तिले काम गर्न नसकेको कारणले गर्दाखेरी अहिले पार्टीको स्वास्थ्य ठीक नभएको देखा परेको छ ।”

यस्तै उनले पार्टी भित्रका पुराना नेताहरुलाई कारबाही गर्ने अन्यलाई प्रवेश गराउने र खेलमा सभापति लागेको बताए । पार्टी प्रवेश गराउने र कारबाही गर्ने काम समय अनुसार ठीक नभएको उनले बताए ।