काठमाडौं उपत्यकामा अत्यावश्यक बाहेकका सेवा तीन हप्ता बन्द हुने, उपत्यका प्रवेशमा कडाई गरिने
मकालु खबर
काठमाडौं । काठमाडौ उपत्यकाका सबै स्थानीय तहहरुले अत्यावश्यकबाहेकका सबै सेवा तीन हप्ताका लागि बन्द गर्ने निर्णय गरेका छन् ।
सोमबार उपत्यकाभित्र रहेका नगरपालिकाका मेयरहरुको संगठन ‘नगरपालिका मेयर फोरम’को बैठकले तीन हप्ताका लागि अत्यावस्यक बाहेकका सबै सेवा बन्द गर्ने निर्णय गरेको हो ।
सार्वजनिक यातायात पूर्णरुपमा सञ्चालन भएपछि संक्रमण तीव्र गतिमा फैलिएको भन्दै सार्वजनिक यातायात सञ्चालनमा भदौ १५ गतेसम्म पुनः रोक लगाउन सरकारलाई अनुरोध गर्ने निर्णयसमेत गरेको छ ।
कलकारखाना, उद्योग धन्दाहरु, निर्वाध रुपमा सञ्चालन भइ मजदुरहरुको दैनिक आवत जावत बढी हुँदा संक्रमणको जोखिम बढीरहेको भन्दै उद्योग तथा कलकारखाना भित्रै क्वारेन्टाइनको व्यवस्था गर्ने र स्वास्थ्य मापदण्ड पूरा गरेपछि मात्रै सञ्चालन गर्न दिने निर्णय गरिएको छ ।
सामाजिक सुरक्षा भत्ता प्रायोजनको लागि नवीकरण गर्ने म्याद असोज मसान्त सम्म कायम गर्न सरकारलाई अनुरोध गर्ने निर्णय गरिएको छ । यस्तै उपत्यका प्रवेश गर्ने प्रस्थान विन्दूहरुमा अत्यन्त कडाई गर्न सरकारलाई अनुरोध गर्ने निर्णय समेत गरिएको छ ।
यसैगरी क्वारेन्टिइन व्यवस्थापन र सञ्चालन नियमावली अनुसार रहने गरी एकीकृत क्वारेन्टिइन संघीय सरकारले सञ्चालन गर्ने र स्थानीय तहले व्यवस्थापनमा सहयोग गर्ने गरी तयारी गर्न सरकारलाई अनुरोध गर्ने निर्णय पनि गरिएको छ ।
यसैगरी र्याली, भेला, अनसन, जुलुस लगायतका गतिविधि गर्न कडाईका साथ निषेध गर्ने र भिड हुने साँस्कृतिक गतिविधि जात्रा पर्व सञ्चालनमा रोक लगाउन सरकारलाई अनुरोध गर्ने निर्णय गरिएको हो ।
मास्कको प्रयोग नगर्नेहरुलाई कारवाही गर्ने विषयमा पनि निर्णय गरिएको छ ।
मकालु खबर
