काँग्रेसको गम्भीर प्रश्न : दश दिन अघि सरकार गुहारेका जनतालाई सुरक्षित ठाउँमा किन सारिएन ?

काठमाडौँ । प्रमुख प्रतिपक्षी नेपाली काँग्रेसले सिन्धुपाल्चोकको जुगल गाउँपालिका–२ लिदीका जनतालाई सरकारले बेवास्ता गरेको भन्दै सुरक्षित ठाउँमा नसारिएकोप्रति गम्भीर आपत्ति जनाएको छ ।

काँग्रेसले शनिवार एक विज्ञप्ति जारी गर्दै लिदीका जनताले दश दिन अघि लिखितरुपमै सरकार गुहार गरे पनि उनीहरूलाई सरकारले सुरक्षित स्थानमा सार्न नसकेको भन्दै आक्रोश पोखेको छ । सरकारले त्यहाँका अमूल्य जीवन जोगाउन नसकेको काँग्रेसको आरोप छ ।

काँग्रेस प्रवक्ता विश्व प्रकाश शर्माले जारी गरेको विज्ञप्तिमा भनिएको छ, ‘जनताले लिखित रूपमा सरकारलाई गुहार गर्दा पनि सुरक्षित स्थानमा सारेर अमूल्य जीवन जोगाउन सरकार किन गम्भीर भएन ?, ‘लिदिबासीका लागि देशमा सरकार हुनुको अर्थ के रह्यो ? जनताको जीवन प्रति राज्यको चरम बेवास्ताको यो भन्दा ठुलो उदाहरण अर्को के हुनसक्छ ?’

लिदीमा शुक्रवार गएको पहिरोमा १६ जनाको मृत्यु भएको छ । २३ जना अझै बेपत्ता छन् । बवेत्तिाहरुको खोजी कार्य जारी रहेको प्रहरीले जनाएको छ ।

यस्तो छ विज्ञप्ति :

सिन्धुपाल्चोकको जुगल गाउँपालिकामा पर्ने लिदीमा गएको पहिरोमा परेर जीवन गुमाएकालाई श्रद्धाञ्जली एवं बाँचेकाहरुलाई उपचार र राहतको कर्तव्य देशले निर्वाह गरिरहंदा घटनासँग गांसिएको गम्भीर प्रश्नबारे गम्भीर बहसको आवश्यकता नेपाली कांग्रेस सार्वजनिक रुपले औंल्याउन चाहन्छ।

जुगल गापाको वडा नम्बर २ का लिदि, नाम्फा, सानोनाम्फा, निम्लुङ, संच गाउँ आदि वस्तीहरुका जनताले पहिरोको जोखिम बुझेर करिब दस दिनअघि सरकार गुहारेर निवेदन दिए पनि जीवन जोगाउन सरकार पुगेन जीवन लिन पहिरो पुग्यो।

यतिबेला सिंगो देशको ध्यान पहिरोले गरेको जनधनको क्षति उपर केन्द्रित हुनु स्वभाविक हो तर पहिरोमा जसले जीवन गुमाए तिनले अघिल्लो सातादेखि नै पहिरोको जोखिमबाट जोगाउन सरकारलाई गुहार्नु तर सरकारको कुनै निकायले पनि त्यहाँका जनतालाई सुरक्षित स्थानमा सारेर तिनलाई जोगाउने दायित्व निर्वाह नगर्नु सामान्य हेलचेक्र्याईं मात्रै होईन राज्यको अक्षम्य गल्ती हो।

प्राकृतिक विपत्ति तत्कालै रोक्ने सामथ्र्य सरकारसँग निश्चय नै हुन्न तर जोखिमको पूर्व सूचना पाएपछि आफ्ना नागरिकलाई सुरक्षित स्थानमा सार्ने कर्तव्य राज्यको थियो।

हामी प्रश्न गर्न चाहन्छौ जनताले लिखित रूपमा सरकारलाई गुहार गर्दा पनि सुरक्षित स्थानमा सारेर अमूल्य जीवन जोगाउन सरकार किन गम्भीर भएन?

लिदिबासीका लागि देशमा सरकार हुनुको अर्थ के रह्यो? जनताको जीवन प्रति राज्यको चरम बेवास्ताको यो भन्दा ठुलो उदाहरण अर्को के हुनसक्छ?

कोरोनाको महामारीसँग जुध्न असफल भइ रहेको सरकार सिन्धुपाल्चोकको घटना पश्चात् शासकीय योग्यता र सार्थक अस्तित्वको शून्यतामा पुगेको छ।

कोरोनाको बढ्दो आक्रामकता र देशका विभिन्न स्थानमा बाढी पहिरोको निर्मम चोट प्रति गम्भीर तदारुकता साथ कार्य गर्न नेपाली कांग्रेस फेरि पनि नेकपाको सरकार संगै तीनै तहका सरकारहरुलाई अपिल गर्दछ।

विश्वप्रकाश शर्मा, प्रवक्ता।