नाग्म पहिराे अपडेटः दुई महिने बालकसहित ४ जनाकाे मृत्यु

कालिकोट । कालिकोटको तिलागुफा नगरपालिका-१ नाग्म बजारमा पहिरोले चार घर पुरिँदा चार जनाको मृत्यु भएको छ ।

आज (आइतबार) बिहान करिब ८/९ बजेतिर आएको पहिरोले घर पुरिँदा ५ वर्षीय निराजन शाही, ८ वर्षीया हिमा शाही, ४० वर्षीया प्रयाग शाही र दुई महिने बालक अक्कल शाहीको मृत्यु भएको हो । घाइतेमध्ये दुई जनाको सकुशल उद्धार गरिएको जिल्ला प्रशासन कार्यालय कालिकोटका प्रजिअ चन्द्र प्रसाद गैरेले मकालु खबरलाई जानकारी दिए ।

‘जिल्ला प्रशासन कार्यालय जुम्ला घटनास्थलबाट नजिक पर्ने हुँदा त्यहाँबाट समन्वय भइरहेको छ । हालसम्म १३ वर्षीय बालक अर्जुन हमाल र ३५ वर्षीय महिला पुण्य शाहीको सकुशल उद्धार भइसकेको छ’, प्रजिअ गैरेले भने ।

करिब १०/१५ मिटर माथिबाट खसेकाे पहिराेले पाँच घर पुरिएकाे भन्ने खबर आएपछि जिल्ला प्रहरी कार्यालय, कालिकाेट र विपद् व्यवस्थापन समिति, जुम्लाबाट ३०/३२ जनाकाे टाेली घटनास्थलमा पुगेकाे थियाे । सशस्त्र प्रहरी, नेपाल प्रहरी र स्थानीयको सहायतामा उद्धार कार्य जारी रहेको पनि प्रजिअ गैरेले बताए ।