प्रविधिको विकास गरी आयात-निर्यातलाई सन्तुलित पार्नुपर्छ : कृषिमन्त्री अर्याल

काठमाडाैं । कृषि तथा पशुपन्छी विकास मन्त्री पद्माकुमारी अर्यालले कृषि जन्य वस्तुहरुको आयात निर्यातमा सन्तुलन कायम गर्न भन्सारलाई अनलाइन प्रणालीमा विकास गर्नुपर्ने बताएकी छिन् ।

कृषि तथा खाद्य पदार्थ आयात गर्दा आवश्यक पर्ने अनुमति, लाइसेन्स र अन्य प्रकृया सम्बन्धमा भन्सार विभाग र कृषि तथा पशुपन्छी विकास मन्त्रालय मातहतका प्लान्ट क्वारेन्टाइन तथा विषादि व्यवस्थापन केन्द्र एवम् पशु सेवा विभाग र खाद्य प्रविधि तथा गुण नियन्त्रण विभागबीच आइतबार मन्त्रालयमा आयोजित कार्यक्रममा मन्त्री अर्यालले यस्ताे बताएकी हुन् ।

अनलाइन प्रणाली सञ्चालन गर्ने सम्बन्धमा सम्झौता गर्न आयोजित साे कार्यक्रममा प्रविधिको विकास गरी आयात निर्यातलाई सन्तुलित पार्नुपर्ने मन्त्री अर्यालले बताइन् ।

भन्सार जाँचपास गर्दा हुने असहजतालाई अनलाइन प्रणालीले सहजता सिर्जना गर्ने र आयात निर्यातलाई सन्तुलन कायम गर्न मद्दत पुर्याउने उनकाे भनाइ छ । प्रविधिको विकास र कार्यान्वयनका लागि प्रविधिमा रुची भएका दक्ष कर्मचारीहरुलाई सम्बन्धित निकायमा राख्ने व्यवस्था गर्न आवश्यक रहेको पनि उनले बताइन् ।

मन्त्रालयका निकायहरु र भन्सार विभागबीच भएको सम्झौताले आयात-निर्यात प्रक्रिया अनलाइन प्रविधिको कार्यान्वयनको चरणमा प्रवेश भएको उनले कार्यक्रममा जानकारी गराइन् । यो प्रणाली लागू भएपछि बाह्य मुलुकबाट कुनैपनि वस्तुको आयात गर्दा सम्बन्धित विभागबाट भौतिक रुपमा उपस्थित भई अनुमति लिनुपर्ने अवस्थाको अन्त्य भएको पनि मन्त्री अर्यालकाे भनाइ छ ।

यसबाट निकासी पैठारीमा समय र लागत कम पर्ने, पैठारीकर्ता भौतिक रुपमा उपस्थित हुनु नपर्ने, सिफारिस पत्रसाथ भन्सार विन्दुमा पुग्नुपर्ने झन्झटको अन्त्य हुने, निर्णय प्रक्रिया द्रुत हुने, काम कारबाही पारदर्शी हुने र शुल्क समेत न्यून हुने भएकाले आयात निर्यातमा सहजिकरण हुने विश्वास गरिएको छ ।