मुहानपोखरीमा एकदिने स्वास्थ्य शिविर : १३ महिलामा आङ खस्ने समस्या

ललितपुर । महिलाहरुको पाठेघर तथा स्तन क्यान्सर सम्बन्धी प्रारम्भिक परीक्षण गर्ने उद्देश्यले नेपाल मेडिसिटी अस्पतालले गृहिणी महिला संघसँगको सहकार्यमा बुढानिलकण्ठ, मुहानपोखरीमा एक दिने स्वास्थ्य शिविर सञ्चालन गरेको छ ।

वरिष्ठ स्तन शल्य चिकित्सक डा.ज्योति रायमाझी र स्त्री तथा प्रसुतिरोग विशेषज्ञ डा. सुभाना दाहालले शिविरमा सहभागी महिलाहरुको स्वास्थ्य जाँच गरेका हुन् । डा. रायमाझीले सहभागी महिलाहरुमा स्तन क्यान्सर रोगबाट बच्न के-कस्ता विषयमा ध्यान दिने भन्नेबारे जनचेतना अभिवृद्धिका लागि जानकारीमूलक सामग्री पनि प्रस्तुत गरेका थिए ।

शिविरमा सहभागी १०० महिलामा गरिएको थर्मोकोगुलेसन प्रविधीबाट उपचार गर्दा १३ जनामा आङ खस्ने समस्या, १२ जनामा विभिन्न खाले संक्रमण, ४ जनामा प्रारम्भिक चरणको क्यान्सरको आशंका तथा १ जनामा स्तन क्यान्सरको आशंका गरिएको छ । स्तन क्यान्सरको लक्षण भए-नभएको आफैँले पत्ता लगाउने तरिका सिकाएकी डा.ज्योति रायमाझीले ४० वर्ष माथिका महिलाहरुलाई म्यामोग्राम टेष्ट गरी ढुक्क रहन सल्लाह दिइन् ।

नेपाल मेडिसिटी, नेपाल अस्ट्रेलियन सर्भाईकल क्यान्सर फाउण्डेशन, बुढानीलकण्ठ नगरपालिकाको संयुक्त आयोजनामा तथा गृहिणी महिला संघ नेपाल, श्री पञ्चेश्वर महिला समाज र शिवपुरी नव जागृत क्लबको संयोजकत्वमा स्वास्थ्य शिविरको आयोजना गरिएको हो ।