लुम्बिनी प्रदेश : चार सांसदको मुद्दा अब पूर्ण इजलासमा

काठमाडौं । लुम्बिनी प्रदेशका ४ सांसदको मुद्दा अब पूर्ण इजलासमा पठाइने भएको छ । पार्टीको निर्देशनविपरीत मतदान गरेको भन्दै कारबाही गरिएका जनता समाजवादी पार्टी (जसपा) नेपालका प्रदेश सभाका सांसदहरु सन्तोषकुमार पाण्डेय, विजयबहादुर यादव, सुमन शर्मा रायमाझी र कल्पना पाण्डेको मुद्दा अब पूर्ण इजलासमा पठाइने भएको हो ।

न्यायाधीशद्वय दीपककुमार कार्की र हरिप्रसाद फुयाँलको संयुक्त इजलासले लुम्बिनी प्रदेश सभा सांसदहरुको रिटको छिनोफानो पूर्ण इजलासबाट गर्ने गरी पूर्ण इजलासमा पठाउने निर्णय गरेका हुन् ।

माओवादी केन्द्र, नेपाली कांग्रेस र जनता समाजवादी पार्टीको गठबन्धनले मुख्यमन्त्री शंकर पोखरेल सरकार ढाल्ने भन्दै वैशाख ६ गते अविश्वासको प्रस्ताव दर्ता गराएका थिए । तर त्यसको ३ घण्टा नबित्दै मुख्यमन्त्री पोखरेलले जसपा महन्थ ठाकुर पक्षका ३ सांसदलाई मन्त्री र एक जनालाई राज्यमन्त्री नियुक्त गरेका थिए । उनीहरुमध्ये ३ जनाले अविश्वासको प्रस्तावमा समेत हस्ताक्षर गरेका थिए ।