पत्रकार र सञ्चार संस्था सम्मानित

काठमाडौं । कोभिड–१९ को महामारीका बीच पनि अग्रपङ्तिमा रही काम गर्ने पत्रकार र सञ्चार संस्थालाई सुनौलो पाइलाले सम्मान गरेको छ । संस्थाले पत्रकार र सञ्चार संस्थालाई बुधबार (आज) एक कार्यक्रमबीच सम्मान गरेको हो । ‘रोज बायोमेडिकल कन्सर्न’को सहयोगमा आयोजित उक्त कार्यक्रममा मकालुखबरसहित अन्य १० वटा सञ्चार संस्था र पत्रकार सम्मानित भएका हुन् ।

संस्थाकी अध्यक्ष रोजिना विष्ट ‘रोज’, बागमती प्रदेशका सांसद छिरिङदोर्जे लामा र गोकर्णेश्वर नगरपालिकाका मेयर सन्तोष चालिसेले संयुक्त रुपमा सम्मानपत्र र प्रेस ज्याकेटसहित पत्रकार र सञ्चार संस्थालाई सम्मान गरेका थिए ।

कार्यक्रमलाई सम्बोधन गर्दै अध्यक्ष विष्टले कोभिडका बीच अग्रपङ्तिमा खट्ने अग्रपङ्तिकारलाई सम्मान गर्न पाउँदा खुसी लागेको बताइन् । ‘रोगको डर नमानी अग्रपङ्तिमा रही जनतालाई सु-सूचित गराउँदै आएका पत्रकारलाई सम्मान गर्न पाउँदा खुसी लाग्यो,’ अध्यक्ष विष्टले भनेकी छन् ।

यस्तै कार्यक्रममा बोल्दै गोकर्णेश्वर नगरपालिकाका मेयर चालिसलेले छिट्टै आफ्नो नगरमा पनि पत्रकार तथा सञ्चार संस्थालाई सम्मान गर्ने बताए । ‘राज्यले गर्नुपर्ने सम्मान एउटा संस्थाले गरेको छ,’ मेयर चालिसेले भनेका छन् , ‘यही नै सम्मानजनक छ ।’

कार्यक्रममा गोकर्णेश्वर नगरपालिकाका प्रमुख सल्लाहकार दीपक रिसाललगाय वडाध्यक्षहरुसँगै बाक्लो सञ्चारकर्मीहरुको उपस्थिति थियो ।