भासु भिरमा जीप खस्दा दुई जनाको मृत्यु, तीन घाइते
धनगढी । कैलालीको भासु भिरमा जीप खस्दा दुई जनाको मृत्यु भएको छ । धनगढीबाट डोटीको गैराका लागि छुटेको प्रदेश ३–०१ ००२३ च ९०५९ नम्बरको जीप कैलालीको चुरे गाउँपालिका वडा नम्बर ३ भासु भिरमा खसेको जिल्ला प्रहरी कार्यालय कैलालीले पुष्टि गरेको छ ।
दुर्घटनामा कैलालीको चुरे गाउँपालिका– ६ की ३६ वर्षीया दुर्गा साउद र डोटीको जोरायल गाउँपालिका–१ कि ५ वर्षीया एलिसा खड्काको मृत्यु भएको जिल्ला प्रहरी कार्यालय कैलालीले जनाएको छ ।
दुर्घटनामा घाइते भएका उनीहरुलाई उपचारका लागि धनगढी ल्याउँदै गर्दा बाटोमै मृत्यु भएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक प्रतीक विष्टले जानकारी दिए ।
दुर्घटनामा अन्य तीन जना घाइते भएका छन् । घाइते हुनेमा जोरायल–१ का जीप चालक रमेश खड्का, २८ वर्षीया निर्मला खड्का र चुरे–६ का सुशिल साउद छन् । उनीहरुलाई उपचारका लागि धनगढी ल्याइँदैछ ।
जीप सडकबाट झण्डै तीन सय मिटर तल खसेको प्रहरीले जनाएको छ । दुर्घटनाको कारण भने खुल्न सकेको छैन ।
