ट्रक र मोटरसाइकल ठोक्किँदा एकको मृत्यु

जनकपुरधाम । धनुषामा ट्रक र मोटरसाइकल एक आपसमा ठोक्किँदा एक जनाको मृत्यु भएको छ । मृत्यु हुनेमा धनुषाको मिथिला नगरपालिका–५ का २६ वर्षीय ओमप्रकाश साह रहेको इलाका प्रहरी कार्यालय ढल्केवरका प्रहरी निरीक्षक प्रदिप सुवेदीले जानकारी दिए ।

आइतबार बेलुका पूर्वपश्चिम राजमार्ग अन्तर्गत मिथिला नगरपालिका–४ पुष्पलपुरस्थित पूर्वबाट पश्चिमतर्फ आउँदै गरेको ग. ८ ख ३३५१ नम्बरको ट्रक र विपरीत दिशाबाट जाँदै गरेको ज. ५ प ९२३६ नम्बरको मोटरसाइकल एक आपसमा ठोक्किँदा दुर्घटना भएको हो ।

दुर्घटनामा परेर गम्भीर घाइते भएका मोटरसाइकल चालक साहलाई उपचारका लागि लालगढस्थित मोडेल हस्पिटल लगिएको र उपचारकै क्रममा उनको मृत्यु भएको प्रहरी निरीक्षक सुवेदीले जनाए ।

उनका अनुसार मोटरसाइकललाई ठक्कर दिने ट्रक र चालक प्रहरीको नियन्त्रणमा रहेको छ । मृतकको शव पोस्टमार्टमका लागि जनकपुरस्थित प्रादेशिक अस्पताल पठाइएको इलाका प्रहरी कार्यालय ढल्केवरले जनाएको छ ।