पहिलो चरणमै सभापतिमा जित्ने शेखरको दाबी

काठमाडौँ । नेपाली कांग्रेसका १४औँ महाधिवेशनमा सभापतिका उम्मेदवार डा. शेखर कोइरालाले आफ्नो समूहले पहिलो चरणमा नै जित्ने दाबी गरेका छन् । महाधिवेशनमा संस्थापनइतर समूहबाट उम्मेदवार बनेका कोइरालाले आइतबार बिहान नेता कार्यकर्ता तथा शुभेच्छुकहरूसँग यस्तो दाबी गरेका हुन् ।

आफ्नो समूहमा सक्षम र योग्य उम्मेदवार रहेकाले पहिलो चरणमै ५१ प्रतिशत बढी मत ल्याएर जित हासिल हुने कोइरालाको दाबी छ । बीपीले परिकल्पना गरे जस्तो र सुवर्णशमशेर, गणेशमान सिंह, गिरिजा प्रसाद कोइराला, कृष्णप्रसाद भट्टराई, सुशील कोइरालाले सपना देखे अनुसारको पार्टी निर्माण गर्न आफ्नो टिम सक्षम रहेको उनको भनाई छ ।

कांग्रेसमा आवश्यक रूपान्तरण गर्न आफ्नो टिम सक्षम रहेकाले पनि आफूहरूको जित सुनिश्चित रहेको बताएका हुन् । उनले ऊर्जा र अनुभव सहितको आफ्नो टिम कार्यकर्ताले चाहे जस्तो पार्टी बनाउन सक्षम रहेकाले आफ्नो समूहमा मतदान गर्न उनले कार्यकर्तालाई आग्रह समेत गरे ।