देउवाले पनि पुर्याएनन् बहुमत, दाेस्राे चरणकाे मतदान हुने
शेरबहादुर र शेखरबीच प्रतिस्पर्धा हुने
मकालु खबर
काठमाडाैँ । नेपाली कांग्रेसको सभापति चयनका लागि दोस्रो चरणको मतदान हुने भएको छ । पहिलो चरणमा भएको मतदानबाट ५ प्रत्याशीमध्ये कसैले पनि ५० प्रतिशत नपुर्याएपछि दोस्रो चरणको मतदान हुने भएको हाे ।
कांग्रेसको विधानअनुसार पहिलो चरणमा सभापतिमा विजयी हुनका लागि कम्तीमा ५० प्रतिशत कटाउनुपर्छ । तर, पहिलो चरणको मतदानबाट कुनै प्रत्याशीले ५० प्रतिशत कटाएनन् ।
पहिलो चरणको मतदानबाट शेरबहादुर देउवा र डा. शेखर कोइरालाबीच रोचक प्रतिस्पर्धा भयो । शेरबहादुरले २२५८ मत ल्याएर ४८.२५ प्रतिशत पुर्याउँदा शेखरले १७०२ मत ल्याए । योसँगै दोस्रो चरणको मतदान हुने भएको हो ।
विधानतः दोसो चरणमा पहिलो चरणमा धेरै मत ल्याउने दुई प्रत्याशी उम्मेदवार हुन्छन् र बढी मत ल्याउने प्रत्याशी सभापतिका रूपमा निर्वाचित हुन्छ । यसरी हेर्दा शेरबहादुर र शेखर दाेस्राे चरणमा उम्मेदवार बन्नेछन् र बढी मत ल्याउने सभापतिका रूपमा निर्वाचित हुनेछन् ।
शेखरको सम्भावना बढी ?
शुरुदेखि नै दोस्रो चरणमा गए शेखर बलियो सावित हुने विश्लेषण गरिँदै आएको थियाे । यसका आधारहरू पनि छन् । खासगरी कांग्रेसमा पुस्तान्तरण चाहने नेताहरूले दोस्रो चरणमा शेखरलाई सघाउने निश्चितप्रायः छ ।
यसअघि सभापतिकै अर्का प्रत्याशी प्रकाशमान सिंहले पनि यो विषयबारे बाेलिसकेका छन् । उनले सकभर आफैँ जित्ने र दोस्रो चरणमा पनि आफू उम्मेदवार बन्न नपाए देउवाबाहेकका प्रत्याशीलाई सघाउने बचनबद्ध गरिसकेका छन् । सोहीअनुसार प्रकाशमानले शेखरलाई सघाउने छन् ।
प्रकाशमान कांग्रेसको नेतृत्वबाट शेरबहादरलाई हटाउनुपर्छ भन्नेमध्येका एक नेता हुन् । प्रकाशमाले पहिलो चरणमा ३७१ मत ल्याएका छन् । सरासर रूपमा हेर्दा प्रकाशमानलाई मत दिने प्रतिनिधिहरूले दोस्रो चरणमा शेखरलाई दिएको खण्डमा शेखर शेरबहादुर निकट पुग्छन् । प्रकाशमान र शेखरको पहिलो चरणको जम्मा मत २०७३ हुन आउँछ । त्यो भनेको ४४.३० प्रतिशत हो । त्यसाे त निधिले पनि शेखरलाई नै सघाउने बुझिएकाे छ । यदि उनले पनि शेखरलाई सघाएकाे खण्डमा शेखरसँग १९५२ मत हुन्छ । त्याे भनेकाे ४१.७१ प्रतिशत हाे ।
त्यसो त शेरबहादुर देउवालाई कसैले सघाउने छाँटकाट छैन । सकभर देउवलाई निधिले सघाउने छैनन् । उनलाई आफूलाई स्वतन्त्र रूपमा संस्थापन पक्षबाट उम्मेदवार बन्न नदिएकाे रिस छ । त्यसाे त निधिले देउवालाई पहिलाे चरणमा चुनाैती दिएका छन् । यदि केहीगरी निधिले देउवालाई सघाए देउवाकाे पक्षमा बल्ल बहुमत जुट्नेछ । तर, निधिले देउवालाई सघाउने सम्भावना कम छ ।
पहिलो चरणमा निधिको पक्षमा २५० मत खस्याे । उनको मत देउवासँग जोड्दा २,५०८ हुन्छ । त्यो भनेको ५३.६० प्रतिशत हाे । यसरी हेर्दा निधि निर्णायक देखिन्छन् ।
मकालु खबर
