‘कबड्डी द फाइनल म्याच’को टिजर सार्वजनिक

काठमाडौँ ।  चलचित्र ‘कबड्डी द फाइनल म्याच’को टिजर सार्वजनिक गरिएको छ । तीन मिनेट लामो टिजरमा पुरानै कलाकार र परिवेशमा मिरुना मगरलाई शिक्षिकाको भूमिकामा देखाइएको छ । टिजर मार्फत यस पटक पनि दयाहाङ राई (काजी) को विवाह नहुने सङ्केत दिइएको छ ।

चलचित्रमा दयाहाङ राई, सौगात मल्ल, बुद्धि तामाङ, विजय बराल, मिरुना मगर, गौमाया गुरुङ, पुष्कर गुरुङ, कविता आले, जयनन्द लामालगायतको प्रमुख भूमिका रहेको छ ।

बाँसुरी फिल्म्सको ब्यानरमा निर्माण भएको चलचित्र राम बाबु गुरुङले निर्देशन गर्दैछन् । चलचित्रको कथा निर्देशक गुरुङले उपेन्द्र सुब्बासँग मिलेर तयार पारेका हुन् ।

चलचित्रको निर्माता मणिराम पोखरेल, अर्जुन कार्की र ओमचन्द्र रौनियार रहेका छन् । चलचित्रमा निमेष श्रेष्ठको सम्पादन, शैलेन्द्र डी. कार्कीको छायांकन र कालीप्रसाद बास्कोटाको संगीत रहेको छ ।

चलचित्र वैशाख २३ गतेबाट प्रदर्शनमा आउनेछ ।